Otg onns suenter l’accident da PCB èsi puspè permess da pestgar en il lai d’egualisaziun Ova Spin. Quai vala dapi il prim da zercladur.
Malgrà che la pestga è dada libra admonescha il chantun da betg mangiar massa bler da quests peschs. Quels sajan anc adina contaminads cun la substanza toxica PCB.
PCB èn cumbinaziuns da clor toxicas che pon effectuar cancer. Fin ils onns 1980 èn questas vegnidas duvradas surtut en transfurmaturs ed implants electrics sco liquid idraulic, però er sco lomiaders en lacs e meds d’isolaziun. PCB tutga entant tar las 12 substanzas toxicas organicas ch'èn vegnidas scumandadas il 2001.
Mesiraziuns hajan mussà che la concentraziun saja sut la limita fixada da l’organisaziun da sanadad mundiala (WHO) ed uschè era betg privlusa scha ins mangia betg massa bler da quest pesch. Il chantun recumandà da betg mangiar dapli che dus purziuns l’emna.
PCB na po betg sa reducir biologicamain
Sin fundament da las valitas mesiradas ha questa contaminaziun a lunga vista consequenzas per la flora e fauna damai che PCB na po betg vegnir reducì biologicamain. PCB po era sa cumular en la chadaina da nutriment pia en ils animals ed en las plantas.