In nov project vul sanar il flum Spöl. Il flum duai vegnir schubregià uschè svelt sco pussaivel dal tissi PCB. Quai communitgeschan il Parc Naziunal Svizzer, las Ovras electricas d'Engiadina, il WWF svizzer per la natira e l'ambient, Aqua viva e Pro Natura Grischun.
Per pudair cumenzar cun ils emprims tests necessaris avant il nov project, vulan las organisaziuns ch'il departament chantunal per la protecziun da l'ambient sisteschia la procedura da recurs cunter la disposiziun da sanaziun existenta fin la fin dal 2022. Sin basa dals resultats da las novas provas ch'i fiss dad examinar, duai il nov proceder vegnir instradà. Sche tut funcziuneschia, duess ins pudair entschaiver cun la sanaziun il 2024.
PCB èn cumbinaziuns da clor toxicas che pon effectuar cancer. Fin ils onns 1980 èn questas vegnidas duvradas surtut en transfurmaturs ed implants electrics sco liquid idraulic, però er sco lomiaders en lacs e meds d’isolaziun. PCB tutga entant tar las 12 substanzas toxicas organicas ch'èn vegnidas scumandadas il 2001.
Tgi che paja tge n'è dentant anc adina betg sclerì. Sco quai che las organisaziuns per l'ambient, il Parc Naziunal Svizzer e las Ovras electricas d'Engiadina communitgeschan, stuess gliez tuttina anc vegnir sclerì sin via giuridica – però pir pli tard. Sche tut las partidas involvidas èn d'accord, lura pudessan las lavurs tuttina cumenzar avant.
Pendent dapi la contaminaziun il 2016
Il settember 2016 èn vegnidas fatgas lavurs cunter corrusiun tar il mir da serra Punt dal Gall sur Zernez. Ina stuppadira ha gì ina rusna, e lura han particlas d'in liquid da protecziun cunter ruina pudì tras ed èn vegnids en il flum Spöl.
Sanaziun dal batschigl da calmar l'onn 2017
L'onn 2017 è lura il batschigl da calmar da 60 meters direct sut il mir da serra vegnì sanà. Igl era dentant betg cler, sche e co ch'il flum suten da 5,6 kilometers duai vegnir sanà, e tgi che paja per quai.
L'Uffizi per la natira e l'ambient dal Grischun ha il favrer 2021 decidì e disponì che las Ovras electricas d'Engiadina han da sanar in toc da 3 kilometers dal Spöl. Quai sco schliaziun da cumpromiss tranter las ovras electricas ch'avevan sanà 60 meters, e las organisaziuns da l'ambient che pretendevan da sanar l'entir Spöl. Encunter quella ordinaziun da sanar han lura las Ovras electricas d'Engiadina, il Parc Naziunal Svizzer e trais uniuns per l'ambient fatg recurs pervia da differents motivs.
