Il Parc naziunal svizzer, las Ovras electricas d'Engiadina, la Pro Natura, il WWF ed Aqua Viva èn sesidas ensemen ed èn sa cunvegnidas co sanar il Spöl, quai scrivan ils involvids en ina communicaziun. I va per nettegiar il Spöl dal tissi PCB ch'aveva tschuffragnà il flum il 2016 en connex cun lavurs vi dal mir da serra Punt dal Gall.
Cunter ina disposiziun da l'Uffizi per la natira e l'ambient dal Grischun avant dus onns aveva il Parc naziunal svizzer fatg recurs e pretendì che l'entir flum vegnia sanà. Era las organisaziuns d'ambient han fatg recurs perquai ch'ils plans dal chantun na tanschian betg. Las OEE han fatg recurs, dentant perquai ch'ellas n'eran betg prontas da pajar per tut la sanaziun.
Optimà las pretensiuns dal chantun
La proposta da las partidas suonda en ils puncts principals a la disposiziun dal chantun dal 2021, en general saja dentant previs da far ina sanaziun pli cumplessiva. Las mesiras vegnan optimadas areguard il grad da polluziun e la morfologia dal flum. En pli duai il batschigl da calmar vegnir schubregià in’ulteriura giada e la part dal flum che vegn sanada prolungada per 90 meters. Alura duai la part sut dal Spöl vegnir derschentada cun aua gronda.
Las partidas èn er sa cunvegnidas davart il dismetter il PCB sco er las controllas suenter la sanaziun e la cumpensaziun per il PCB che resta malgrà tut las mesiras en il flum. La finamira è da cumenzar cun las lavurs l’onn 2024. Davart il punct dispitaivel da la finanziaziun da la sanaziun n'èn las partidas betg s'exprimidas en lur communicaziun.
PCB èn cumbinaziuns da clor toxicas che pon effectuar cancer. Fin ils onns 1980 èn questas vegnidas duvradas surtut en transfurmaturs ed implants electrics sco liquid idraulic, però er sco lomiaders en lacs e meds d’isolaziun. PCB tutga entant tar las 12 substanzas toxicas organicas ch'èn vegnidas scumandadas il 2001.
Or da l'archiv:
