La motivaziun da crear la pagina per emprender rumantsch vallader saja stada ch'el n'haja betg vulì crear sulettamain in palpiri teoretic che nagin vul leger, di Corsin Zini. Suenter in onn da lavur è sia pagina dapi l'avust finalmain online.
Las pli grondas sfidas
En emprima lingia sa drizzia la pagina a persunas ch’emprendan vallader sco lingua estra. Ella duai cumplettar l'instrucziun linguistica. Cunquai ch'el sez na saja betg scolast per rumantsch sco lingua estra saja ina da las grondas sfidas stada da tscherner ils cuntegns per la pagina. Per far quella decisiun haja el discutà cun scolasts dal fatg ed saja era sa sfundrà en la teoria.
I dat per exempel exercizis cun verbs impurtants, dumondas tar in text u gieus per il stgazi da pleds. Tar differentas tematicas sto il scolar schliar plirs memoris e tscherner l'endretg maletg va a prà cun il pled ch'ins auda sco audio.
Jau hai dà gronda paisa a l’emprender a moda e maniera termaglianta e ch'ins survegn immediat in resun suenter l’exercizi.
In'ulteriura gronda sfida saja stà il programmar, qua haja Corsin Zini stuì «morder en»: leger ina massa teoria, ir per agid tar collegas versads en l'informatica e schliar in problem suenter l'auter. Suenter la tarmenta lavur d'in onn, ch'il scolast da 25 onns ha fatg, n‘è la pagina dentant anc betg finida dal tuttafatg. Quella saja la basa per vegnir sviluppada vinavant cun agiuntar ulteriurs exercizis.
Cunquai che Corsin Zini ha cumenzà a dar scola n'haja el actualmain naginas capacitads da svilupar sez vinavant la plattafurma. Perquai ch'el chattass donn sch'i na dess nagina cuntinuaziun saja el actualmain en discurs cun differentas persunas per chattar insatgi che tgiria vinavant e cumpletteschia la pagina.
Las cifras da visitaders mussan en mintga cas, che la pagina vegnia duvrada. Magari haja dà 150 visitaders e visitadras a di. Per Corsin Zini han las stentas da far insatge practic enstagl da be teoria sco lavur da master pia en mintga cas rendì.