Cun ses text «Contas gadas» ha Viola Cadruvi persvadì la giuria dal Premi Travers e survegnì il premi dotà cun 10'000 francs – per finir ussa l’ovra che vegn lura preschentada publicamain al Festival Travers 2027.
Premi nunspetgà
«Per mai d’era bain ina surpraisa cur che jau hai udì che jau survegnia il premi», di Viola Cadruvi. E quinta lura ch’ella haja pir scrit la saira avant l’ultim termin d’annunzia il text. «L’idea per quest toc aveva jau gia pli ditg, ma mess sin palpiri l’hai jau propi pir l’ultima saira ch’igl era pussaivel.»
Il text premià cun il titel «Contas gadas» è scrit en sursilvan – per l’autura che scriveva fin uss en rumantsch grischun ina premiera. Igl è il monolog d’ina dunna en la vegliadetgna tranter 30 e 40 ans che aveva atgnamain l’impressiun da viver en ina lètg stabla, ma vegn lura a savair che ses um ha pliras afferas. «Quai metta en dumonda sia lètg, ma era tut auters puncts en sia vita», di Viola Cadruvi. «Ella ha ils davos onns bajegià si ina vita paschaivlamain burgaisa – e bada lura che quai era mo in construct.»
Persvadì cun stortas surprendentas
A la giuria dal Premi Travers ha persvadì il text da Viola Cadruvi cun «ina lingua autentica e contemporana», cun «intensitad e tempo». En sia laudatio ha Fadrina Hofmann sco represchentanta da la giuria ditg che «la reflexiun intima davart la situaziun persunala prenda vias e stortas surprendentas». E che persvadì haja il text era perquai ch’el «permetta vastas pussaivladads da furmas teatralas en divers settings».
Lavur senza lectorat minuzius
Cun excepziun d’in toc da teater ch’ella aveva scrit per sia lavur da matura è «Contas gadas» l’emprima lavur da Viola Cadruvi previsa per il palc. Uschiglio ha ella scrit prosa, columnas e scenaris. «Sche la lavur vi d’in text per il palc sa differenziescha da quai, na sa jau anc betg», di l’autura, «ma il pli flot è che la lavur stentusa da correctorat e lectorat minuzius ch’è necessaria tar ina publicaziun sin palpiri scroda.» Fin uss exista pir in fragment dal monolog ed in concept per l’ovra cumplessiva. Grazia al Premi Travers prevesa Viola Cadruvi da finir il monolog en ils proxims mais.
Il premi, ils raps – gliez munta era temp. Insatge ch’e n’è betg adina evident, sch’ins scriva per rumantsch.
Sia ovra vegn Viola Cadruvi lura a surdar ad ina reschissura u in reschissur ed ad in’actura. La premiera è previsa la stad 2027 al Festival Travers a Zuoz.