I gira insatge areguard la mancanza d’abitaziuns per indigenas ed indigens da Segl fin a La Punt Chamues-ch. Bundant 290 abitaziuns èn planisadas per vegnir construidas ils proxims onns.
In grond project en in lieu
A Samedan è il plan da construir bundant 120 abitaziuns per indigens. Da quellas fissan 70 planisadas sin il terren a Promulins sut la staziun da Samedan. Quest project è da la vischnanca burgaisa.
Quai èn ils projects
-
Bild 1 von 10. Visualisaziun dal project «Palü» cun 70 novas emprimas abitaziuns da la vischnanca burgaisa da Samedan. Bildquelle: Vischnanca burgaisa Samedan.
-
Bild 2 von 10. Visualisaziun da las trais chasas cun 27 abitaziuns pajablas da la cooperativa «Insembel». Bildquelle: Cooperativa «Insembel».
-
Bild 3 von 10. Uschia duai vesair or il project «Alvra» da la vischnanca da La Punt Chamues-ch cun 21 abitaziuns per indigens. Bildquelle: Vischnanca da La Punt Chamues-ch.
-
Bild 4 von 10. Las trais chasas dal project «Pros da God» a Puntraschigna (il project è gia en construcziun). Bildquelle: PDG SA Puntraschigna.
-
Bild 5 von 10. Il project da la vischnanca da Schlarigna cun 11 emprimas abitaziuns. Bildquelle: Vischnanca da Schlarigna.
-
Bild 6 von 10. Chasa cun 19 abitaziuns pajablas per persunas singulas u cuminanzas d'abitar sin l'areal da Signal, in project da la vischnanca da San Murezzan. Bildquelle: Vischnanca da San Murezzan.
-
Bild 7 von 10. Cun 31 emprimas abitaziuns è il project da la vischnanca da San Murezzan situà gist dasper la chasa d'attempads Du Lac. Bildquelle: Vischnanca da San Murezzan.
-
Bild 8 von 10. Project «Foppas» da la vischnanca da Silvaplauna, cun tschintg chasas ed in hotel cun 200 letgs. Bildquelle: Vischnanca da Silvaplauna.
-
Bild 9 von 10. Cun 12 abitaziuns per famiglias indigenas è il project «Las famiglias» in da la vischnanca da Silvaplauna. Bildquelle: Vischnanca da Silvaplauna.
-
Bild 10 von 10. Project cun ina chasa da pliras famiglias cun 18 abitaziuns da la cooperativa Lagrev a Segl. Bildquelle: Cooperativa Lagrev / Barmettler Architekten, Cham.
Dapi il 2022 è la suprastanza enturn il president Dumeng Clavuot londervi a planisar. «Jau sun stà surprais, quant temp ch'il project ha duvrà fin a quest punct», ha ditg il president da la vischnanca burgaisa da Samedan, Dumeng Clavuot.
Per garantir fits bass per las abitaziuns duai esser tut en maun da la vischnanca burgaisa. Da la planisaziun sur la construcziun fin a l’administraziun dal bajetg.
Igl è essenzial che betg memia blers «players» èn vidlonder, che vulan avair in toc da la turta.
Uschia duain ils fits da las abitaziuns sa drizzar als custs effectivs dal bajetg – e betg al martga d’immobiglias da l’Engiadin’Ota. Ma emprim duai uss vegnir fatga la dumonda da construcziun a la vischnanca. Quai duai capitar fin proxima primavaira. E planisà è che las abitaziuns duain esser prontas per abitar l'onn 2029.
Project pli pitschen ed organisà auter
La plaiv evangelica da l’Engiadin’Ota Refurmo posseda a Samedan duas parcellas da bajegiar. Qua duessan vegnir stgaffidas 27 abitaziuns pajablas en trais chasas. Però i na saja betg pussaivel a la plaiv Refurmo da fabritgar sezza las chasas, di il president Luzian Schuccan. La finanziaziun fiss in pass memia grond per els.
Uschia è la plaiv sa decidida da dar il dretg da construcziun a la cooperativa «Insembel». Tenor il president da Refurmo èn era ils fits per il dretg da construcziun calculads senza in gudogn per la plaiv. Uschia saja era segirà ch'ils fits per las abitaziuns na sajan betg memia auts.
Quai che nus na vulain betg areguard las abitaziuns è speculaziun. Perquai han ins tschertgà la soluziun cun la cooperativa e cun reglas fitg cleras.
La vischnanca vul svilup, però cun in bun mix
Il president communal da Samedan Gian Peter Niggli è cuntent, ch'en sia vischnanca vegnan construidas abitaziuns. Tenor el saja per la vischnanca fitg impurtant ch'il mix tranter emprimas abitaziuns a fit, emprimas abitaziuns per cumprar e segundas abitaziuns è bun.
La vischnanca duai procurar ch'era l’infrastructura correspunda. Quai cun metter a disposiziun per exempel l’aua, ils servetschs da naiv, la segirtad cun glisch da notg ed era il traffic che duai vegnir reglà.
Uschia duai Samedan esser ina vischnanca che crescha ed è averta per tut la glieud. Gian Peter Niggli ha però era in egl sin las lezias che l’administraziun communala duai far.
El e la suprastanza da Samedan èn persvas, ch'i n’è betg la lezia da la vischnanca da construir abitaziuns cun raps publics. Incumbensa da la vischnanca saja da metter a disposiziun terren da bajegiar, da stgaffir bunas cundiziuns e da decider svelt ed uschia betg far cumplitgada la situaziun.