Ils 20 da mars ha la Dretgira superiura dal Grischun decidì cunter ils recurrents da l'Hotel Flaz a Puntraschigna. Quels vulevan cuntanscher che lur recurs haja in effect suspensiv per il permiss da construcziun da l'hotel planisà sin la plazza da sport Roseg a l’ur dal vitg.
Uss po vegnir bajegià
Era sch'il recurs è anc adina pendent davant la dretgira e sto vegnir decidì dals derschaders chantunals, vulan ils investurs enturn l'hotelier engiadinais Kurt Baumgartner cumenzar il zercladur cun il stgavament da l'hotel. Co che Baumgartner ha ditg envers RTR, saja el cuntent ch’ins possia suenter var 15 onns uss cumenzar cun il bajetg.
Iniziativa, pass giuridics ed ina petiziun
Dal 2014 èn ils votants e las votantas da Puntraschigna sa decidì da stgaffir la basa legala da planisaziun – quai cun midar la zona pertutgada en ina zona d’hotel. Trais onns pli tard, dal 2017, ha quai dà ina iniziativa communala cunter il project d’Hotel. Quella è pero vegnida declerada nunvalaivla il prim da la vischnanca Puntraschigna e pli tard era dal tribunal federal.
Las dispitas giuridicas han cuntinuà fin uss. Davant la dretgira superiura chantunala è pendent ina protesta davart la prolungaziun dal permiss da fabrica da l'Hotel Flaz. Il cumenzament da mars ha ina gruppaziun enturn il advocat Diego Schwarzenbach lantschà avant in onn ina petiziun cun circa 2'000 suttascripziuns per mantegnair la plazza da glatsch, da sport e da gieu.
La vischnanca refusa la petiziun
Per la vischnanca da Puntraschigna ha la petiziun ina finamira: dad impedir la fabrica dal nov hotel cun relaschar ina zona da planisaziun per l’areal. Tenor la vischnanca n'avess ina tala zona da planisaziun betg effect giuridic. Quai pervi da ch'il permiss da fabrica saja gia avant maun.
Era saja sin via gia in nov project per duvrar ils conturns da l’hotel nov sco ina plazza da glatsch, da sport e da gieu public, sco che la petiziun ha giavischà.
Reacziun dals petiziunaris e da las petiziunarias
Per las set persunas che stattan davos la petiziun, èn dischillus da la resposta, uschia Diego Schwarzenbach. Tenor els ed ellas avess'ins spetgà dapli da la vischnanca, sco per exempel da dumandar las votants e votants da Puntraschigna en chaussa.
Far frunt cunter questa refusa n’è betg pussaivel, perquai che quai saja be ina petiziun, usche ils petiziunaris.