RTR: La notg dals 17 sin ils 18 da zercladur 2025 ha in urs stgarpà quatter nursas en la Val S-charl en l'Engiadina Bassa. È quai stà il medem urs sco quel ch'era dacurt en il Grischun Central ed a Tavau?
Arno Puorger: Quai na savain nus betg dir, i mancan anc adina ils resultats genetics. Quai è normal. I dura simplamain in temp enfin ch'ins sa quai. Areguard la distanza èsi da principi pussaivel, igl è però ina gronda distanza. Uschia ch'igl è gist uschè pussaivel ch'i fiss in segund urs. Ma fin uss na sa lascha betg excluder ch'igl è il medem urs.
Sin basa da tge pon ins insumma dir che quai è stà in urs e betg in auter animal, sco per exempel il luf?
Quai valitescha il guardiachatscha al lieu a maun da las feridas vi dals animals. Il luf lavura surtut cun ina morsa en il culiez da la nursa. Percunter pitga l'urs cun sias pattas. Quai chaschuna autras feridas ch'èn tipicas per l'urs. Uschia vegnan ins da differenziar quai fitg bain.
La davosa giada ch'in urs ha attatgà animals da niz en il Grischun è stà avant quatter onns. È ina tala attatga pia insatge rar?
Quai è grev da dir per il mument. Nus avain pli baud segir era gì en l'Engiadina Bassa attatgas che han chaschunà bleras nursas mortas. Entant è vegnì il luf e cun quai è er la protecziun da las scossas vegnida meglra. Ed ussa n'avain nus anc betg propi valurs d'experientscha. Nus savain però era ch'igl è different dad urs tar urs.
Quai è sco da leger ina culla da cristal.
Quai vul dir: tar nus pudessi ussa puspè esser quiet plirs onns. I po però er esser ch'in urs mussa propi in cumportament in pau pli problematic.
E co va quai ussa vinavant?
Nus faschain vinavant noss monitoring. Sch'i dat stgarps, van ins al lieu. Nus avain in sistem da SMS, cun quel avain nus infurmà ils purs ed ils apiculturs ch'igl è anc adina impurtant da prender las mesiras da prevenziun – surtut era tar ils apiculturs. Ed uschia èsi pussaivel che quest urs è forsa gia puspè en l'Italia. Quai stgarp era propi fitg damanaivel dal cunfin. Ma igl è era pussaivel ch'el è anc adina en la regiun. Nus surveglian vinavant la situaziun.