La radunanza da la corporaziun evangelica d’Engiadin’Ota, Refurmo, ha approvà il preventiv 2026. Quel prevesa ina vasta extensiun da l’offerta che cumpiglia tut – da la pastoraziun sur la lavur cun giuventetgna e seniors e fin a la musica da baselgia.
Nus avain ina pluna infrastructura da mantegnair – e stuain far pliras lavurs da sanaziun urgentas e renovaziuns vi da differentas baselgias.
Ultra da quai stettia Refurmo avant investiziuns considerablas per il mantegniment dals edifizis, di il president da la corporaziun, Lucian Schucan.
In element central dal budget èn las investiziuns da var 820'000 francs per il mantegniment dals edifizis. Quai saja essenzial per garantir la preservaziun dal patrimoni cultural prezius da la regiun, agiunta Lucian Schucan. En ils proxims tschintg onns vegnan spetgadas investiziuns da var otg milliuns francs per il mantegniment da baselgias impurtantas sco San Lurench a Segl Baselgia, la baselgia englaisa a San Murezzan e San Gian a Schlarigna.
Sfidas finanzialas e mesiras da taglia
Refurmo stoppia sa preparar sin entradas da taglia pli bassas en consequenza da decisiuns fiscalas chantunalas e naziunalas, per exempel tras l’augment da las deducziuns per famiglias.
Per garantir la stabilitad finanziala, è il pe da taglia vegnì augmentà per 3,5 puncts procentuals sin 14%. Questa mesira è essenziala per surmuntar las sfidas finanzialas dals proxims onns e per garantir la cuntinuitad da las offertas da la baselgia. Per mitigiar la chargia finanziala da las investiziuns planisadas èn er previsas acziuns da rimnar daners.