A San Murezzan ha gì lieu ina occurenza iniziala, in uschenumnà kick-off, per il project «Regio Retica». Tge che tuna forsa l'emprim mument sco il num d'in nov tren da la Viafier Retica è en realitad tut insatge auter. Cun «Regio Retica» vuless ins numnadamain promover la collavuraziun sur cunfin tranter la Lumbardia en Italia, surtut la provinza Sondrio, cun il Grischun u pli exact, cun las regiuns Malögia e Bernina.
La finamira da quest project saja il barat sur ils cunfins, ha la presidenta communala da Segl e parsura da la regiun Malögia, Barbara Aeschbacher ditg envers il schurnal regiunal da SRF. Ins saja manaivel in da l'auter, ins haja barats, per exempel da lavurantas e lavurants. Tar la furmaziun hajan ins magari las medemas u sumegliantas pretaisas. I giaja per approfundar las ragischs communablas. Quai possian er esser lioms famigliars.
I va per ragischs communablas ch'ins po sviluppar e ch'ins po prender sco basa per stgaffir per las regiuns dad omaduas varts dal cunfin avantatgs.
Cun «Regio Retica» vuless'ins surtut simplifitgar la birocrazia e vegnir pli effizient quai che pertutga projects sur cunfin. Concret pudessi per exempel ir per il turissem e per plazzas da lavur. Fin uss, sa concurrenzeschan las regiuns per impiegads ed impiegadas en differents secturs da lavur. «Regio Retica» duess schliar quai.
Ina sfida pudess dentant esser tar quella collavuraziun sur cunfin, per exempel la differenza da leschas en la Svizra ed en l'Italia. Omadus pajais hajan lur atgnas prescripziuns. Ma i saja adina uschia, che sch'ins enconuschia las persunas e chattia ina lingua cuminaivla, saja savens pli simpel da reducir las barrieras birocraticas.
Barbara Aeschbacher di vinavant ch'ella saja presvadida che tuttas duas varts vegnian a profitar da questa collavuraziun.
Sco proxim vegnian messas en funcziun ina gruppa directiva ed ina gruppa da lavur che duessan elavurar temas concrets. «Regio Retica» saja in grond project che vegnia a durar ditg. E cun il di dad oz saja damai fatg l'emprim pass.