Il terren da fabrica disponibel sin l’areal industrial «Serlas» vegn surfabritgà quasi cumplettamain. Pliras firmas èn fortunadas d’avair chatta in nov lieu. Tranter auter datti en avegnir ina furnaria, ina firma spezialisada per far midada ed ina bieraria.
Daniel Käslin, il possessur da la bieraria Engiadinaisa SA è cuntent d’avair chattà finalmain in nov lieu, er sche S-chanf saja stada l’ultima opziun. El ha tschertgà passa 10 onns in lieu ed evaluà 35 projects.
Ensemen cun noss partenaris avain nus finalmain chattà ina buna soluziun per fabritgar ina nova bieraria.
Nova vita en vischnanca
Allegraivla è la situaziun er per la vischnanca da S-chanf. Sco ch'il president communal, Riet Campell, di, possia dar nova vita en la vischnanca, oravant tut er perquai ch’i vegnan realisads studios per impiegads ed impiegadas. Er sch’il purtret actual na til plascha betg bain, el saja da buna speranza ch’i dat en avegnir in lieu attractiv a l’ur da la vischnanca.
