Suenter duas cunvegnas da prestaziun refusadas per spendrar il provediment da sanadad e sia finanziaziun en l'Engiadin'Ota è ina nova proposta sin maisa. Cun questa vul la Fundaziun per il provediment da sanadad en l'Engiadin'Ota SGO garantir il provediment en la val, e garantir in avegnir per l'ospital a Samedan, ils centers per attempads «Du Lac» e «Promulins» e da la Spitex.
Cunquai che la SGO, ch'è actualmain en in moratori, daventa insolventa la fin da mars, va questa suenter en liquidaziun, communitgescha la SGO. Perquai dovria ina nova organisaziun purtadra che reglia da moda lianta las responsabladads, la finanziaziun e la direcziun dal provediment da sanadad.
«Sanadura» duai far remedura
Tenor la SGO è in'instituziun da dretg public (num proponì: «Sanadura») la cundiziun per reglar da nov il provediment da sanadad. Questa duai garantir il provediment a partir da l'avrigl, cura che la SGO vegn liquidada. La Sanadura po pajar terzs per las prestaziuns – ubain era porscher sezza ellas, nua ch'i fetschia senn.
En questa organisaziun dal dretg public crudass era l'obligatori che tut las 11 vischnancas ston consentir a projects. Da nov tanschessi sche 7 schessan Gea. Questas 7 vischnancas ston però supplementarmain represchentar almain la mesadad da las votantas ed ils votants en la regiun.
Sche la fundaziun da l'instituziun «Sanadura» vegn refusada, lura ston serrar tut ils manaschis da la SGO.
Senza ina tala organisaziun purtadra na pudessian ins en mintga cas betg mantegnair ils manaschis che la SGO maina actualmain. Quai è l'ospital a Samedan, ils centers per attempads «Du Lac» e «Promulins» e la Spitex. Co che las vischnancas vegnissan lura organisar il provediment da sanadad ed ils centers per attempads è anc avert.
Ospital chantunal e clinica Gut siglian en ils fiers
Per garantir il provediment acut surpiglian l'Ospital chantunal e la clinica Gut transitoricamain las incumbensas sco fixà en cunvegnas da prestaziun ch'èn era anc d'approvar. Ina nova societad anonima – la «Ospital Engiadin'Ota SA» duai reglar che las prestaziuns sajan confurmas als basegns regiunals e surpiglia l'ospital a Samedan sco locataria. Era ella po incumbensar terzs u prestar agens servetschs per garantir il provediment d'urgenza, però era staziuns spezialisadas, letgs per observaziuns e la tgira da pazientas e pazients grev malsauns u grev blessads, communitgescha la SGO. Las cunvegnas èn terminadas sin la fin dal 2026. En il decurs dal 2026 duai vegnir elavurada ina cunvegna da prestaziun che pudess lura valair ils onns suandants.
Sche questa cunvegna da prestaziun vegnia refusada, lura mancass la basa per ina collavuraziun cun las clinicas che la Fundaziun Ospital chantunal Grischun maina – numnadamain las atgnas e quellas da la clinica Gut che tutgan latiers. E quai munta che l'ospital a Samedan vegniss serrà senza remplazzament, scriva la SGO.
Centers per attempads e Spitex
Era la tgira a lunga vista en ils centers per attempads ed il manaschi da la Spitex duai la Sanadura manar vinavant – quai ubain cun incumbensar terzs – ubain manar sez. La finamira principala è tenor communicaziun da garantir ina tgira fidada cun process stabils. Ina externalisaziun vegnia actualmain evaluada cun partenaris externs pussaivels.
Era qua muntass in Na a la cunvegna preschentada ch'il manaschi dals centers per attempads e da la Spitex na fissan betg pli pussaivels e la tgira a lunga vista na fiss betg garantida, scriva la SGO.