La decisiun per u cunter il credit da 50,8 milliuns francs per l’ospital da l’Engiadin’Ota a Samedan fa fastidi. Per las 350 persunas che lavuran a l’ospital è quella fasa da decisiun difficila a supportar.
Il futur da l’Ospital regiunal è fitg intschert. Sche la populaziun d’Engiadin’Ota sa decida ils 4 da november 2025 u ils 14 da december per in Na al credit da 50,8 milliuns francs per ils proxims dus onns sto l’ospital – in la furma sco ch'el ha oz – serrar sias portas.
Tar in Gea survegniss l'ospital per dus ulteriurs onns in temp transitoric per pudair sviluppar in plan per il futur.
Il Telesguard ha pudì far la visita en l’ospital ed ha accumpagnà persunas che lavuran dapi decennis en il segund grond ospital dal chantun Grischun.
Per il persunal sco era per blers indigens è quel fatg grev a supportar. En emprima lingia n'èsi betg cler co ch’il provediment da sanadad per la val guarda ora, da l’autra vart na sa il persunal betg tge che capita cun el suenter la primavaira 2026.
In Gea fiss in levgiament
Samuel Haupt, co-schefmedi e manader da l'ortopedia, raquinta da la impussanza ch'el e ses team resentan. El vesa ina surdada ordinada entaifer dus onns sco la meglra soluziun per las pazientas ed ils pazients, quai cuntrari ad ina procedura da concurs abrupta.
Il pli difficil è quella impussanza e ch'i dess entaifer circa trais mais in concurs. Quai na fiss betg bun per noss pazients, ma era betg per noss persunal.
La staziun d'urgenza da l'ospital è da tut temp pronta – per la stagiun auta cun passa 100'000 persunas en la regiun, ma era durant la stagiun morta. Denise Hoebenreich, manadra da la staziun d'urgenza, accentuescha ch'il team versà saja ina pitga impurtanta en questa situaziun da crisa. Il barat e la collavuraziun interdisciplinara èn decisivs per mitigiar temas e malsegirezzas.
In bandierel a l'ospital fa reclama per in gea a la nova cunvegna da prestaziun e mussa l'iniziativa dals umans che stattan davos il segund grond ospital dal chantun Grischun.