La halla da chavaltgar a la riva dal Lai da San Murezzan è serradi dapì l’onn 2013 pervi da privel da crudar ensemen. Il stabiliment da lain è passa 100 onns vegl ed i na dat nagina garanzia ch’il tetg tegna las massas da naiv. Avant in onn ha la populaziun approvà in credit per planisar ina sanaziun ed ina nova utilisaziun per la halla istorica.
Ils 27 da november decida il suveran davart ils plans concrets ch'èn vegnids elavurads. A la saira d'infurmaziun mardi a San Murezzan han da quai da 100 persunas prendì part.
Il stabiliment existent duai vegnir sanà ed i duai vegnir construì in'annexa per in bistro. Las investiziuns muntan a 15,3 milliuns francs.
Suprastanza versus parlament
La suprastanza communala accentuescha la necessitad d'in center da cultura e d'inscunter a San Murezzan.
Jau speresch ferm che la populaziun enclegia tge bischu che nus avain a la riva dal lai. La schanza da pudair puspè avrir la halla stuain nus nizzegiar.
Cuntravent per il project sco tal datti plitost pauc - i dat però critica per la summa d’investiziun. Sper ils 15,3 milliuns francs per la sanaziun vegnissan numnadamain mintg'onn vitiers ils custs da gestiun. Qua prevesa la vischnanca, che gestiunass il center da cultura, in deficit annual da var 1,3 milliuns francs.
En vista a tut ils projects planisads, na po la vischnanca betg sa prestar ina tala sanaziun da la halla da chavaltgar.
Cun ina vusch differenza ha il parlament communal decis da proponer in Na a la populaziun. Quella decida ils 27 da november a l’urna davart il project. Per cas che la dumonda da credit vegn refusada, smanatscha la halla da chavaltgar d’ir en muschna.
Plinavant decida la vischnanca da San Murezzan er ils 27 da november davart in credit per sanar la chasa da parcar Quadrellas.
