La Clinica Serletta duess daventar la nova dimora per la Clinica Gut a San Murezzan. L’edifizi planisà fa part dal project «Serletta Süd». Quel prevesa ina clinica ed in hotel da sanadad daspera. La populaziun da San Murezzan aveva approvà il project cun in cler gea a l’urna l’onn 2015.
Cas pendent
Ils possessurs dals dus hotels da 5 stailas Kulm e Badrutt’s Palace ed er dus ulteriurs vischins, cumbattan dapi onns cunter ils plans dal project «Serletta Süd». Surtut l’autezza è dispitaivla. Suenter ch’ils adversaris han fin uss pers en tut las instanzas, è il cas actualmain pendent avant il Tribunal Federal a Losanna.
In suenter l’auter
Sco che Christian Gartmann, il pledader da la Chris Silber San Murezzan SA ha ditg envers RTR, duai la nova Clinica Serletta da principi funcziunar suletta, er senza l’hotel da sanadad daspera. Perquai hajan els decis d’inoltrar gia uss la dumonda da fabrica per la nova clinica. Previs èn investiziuns da 32 milliuns francs.
I fa prescha
Ils adversaris sajan fin uss adina stads encunter in nov hotel e betg encunter la clinica, ha suttastritgà Gartmann. Per la Clinica Gut fai entant prescha, ella ha numnadamain da bandunar las localitads a la Via Arona il pli tard il 2023.
Perquai vegnia examinà vinavant en trais ulteriurs lieus pussaivels per fabritgar novas localitads per la clinica. Tranter auter sper il Heilbad a San Murezzan Bogn ed a Surlej.
