La suprastanta Regula Degiacomi ha infurmà il cussegl communal ch'in cumenzament da las lavurs da construcziun anc quest atun na vegnia betg ad esser realistic. Motiv saja in recurs dad ina cuminanza da proprietaris en condomini. Quest recurs na saja anc betg schlià. La cuminanza aveva prendì a tschains parcadis sin il parcadi Du Lac.
Bain haja la radunanza dals proprietaris entant acceptà in barat da terren cun la vischnanca per fabritgar agens parcadis. I manchia dentant anc il consentiment en scrit da quests commembers, che n'eran betg preschents a la radunanza. Pervi da quest recurs manca era anc l'ok da la regenza grischuna. Cun quel fa Regula Degiacomi quint l'october.
Oriundamain era previs da cumenzar cun las lavurs anc quest'atun. L'inauguraziun da la nova chasa da tgira per San Murezzan, Silvaplauna e Segl fiss stada planisda l'onn 2023.
