L’unica tractanda a la sesida dal parlament da San Murezzan ha procurà ina debatta ferm animada. Il cussegl communal ha gì da decider sche l’iniziativa per ina reediziun da la planisaziun locala Serletta Sid – suttascritta da 400 persunas – duai vegnir declerada giuridicamain valaivla u betg.
La suprastanza da San Murezzan aveva suttamess al parlament la proposta da declerar l’iniziativa sco nunvalaivla. Quai causa che quella stettia en cuntradicziun cun il dretg surordinà da la vischnanca – e perquai ch’il Tribunal federal haja gia decidì en chaussa. Il parlament ha finalmain sbittà quest intent cleramain e pretenda che la populaziun da San Murezzan possia anc ina giada decider en chaussa a maun da l’iniziativa.
Novas premissas
La situaziun e las circumstanzas en connex cun Serletta Sid saja sa midada massivamain dapi il 2015, uschè il co-iniziant e cusseglier communal Gian-Andrea Conrad. Avant stgars 9 onns tar la votaziun a l’urna era la Clinica Gut omnipreschenta e la tema fitg gronda che quella bandunass San Murezzan en il cas ch’ella na pudess betg avair in nov dachasa a Serletta Sid. La situaziun è uss cumplettamain autra, la Clinica Gut ha realisà entant a San Murezzan Bogn ina nova dimora. Perquai vulan ils iniziants surlavurar anc ina giada la planisaziun locala Serletta Sid.
Encunter la decisiun dal parlament da San Murezzan po vegnir fatg recurs entaifer 10 dis tar la Dretgira administrativa.
Entant ha la suprastanza da San Murezzan sistì la dumonda da construcziun da la possessura da la parcella Serletta Sid, la Chris Silber SA. Ultra da quai ha San Murezzan er laschà sistir tut ils process ch’èn pendents avant Tribunal federal.
