I na dat nagina votaziun nova davart la planisaziun Serletta Sid a San Murezzan. La Dretgira superiura grischuna ha declerà nunvalaivla l'iniziativa ch'era vegnida inoltrada il 2023. Quai rapporta la Posta Ladina. L'iniziativa pretendeva dad anc ina giada laschar votar a l'urna davart la revisiun da la planisaziun locala Serletta Sid ch'era vegnida approvada il 2015. Quai da lezzas uras cun in resultat fitg cler.
Tenor ils iniziants sajan las circumstanzas entant sa midadas. La Clinica Gut che vuleva midar en quel lieu, ha tras retards dal projec tras recurs bajegià a San Murezzan Bogn ed avert là sia clinica.
Suprastanza e parlament betg d'accord
Anc avant in onn aveva il parlament suenter lunga debatta, expertisas e cunterexpertisas, la finala decidì che l'iniziativa cun 400 suttascripziuns saja valaivla. Cunter la veglia da la suprastanza.
Auter la Dretgira superiura il mars passà: Tenor ella n'è la revisiun da la planisaziun locala Serletta Sid da lezzas uras betg individualisada sin la Clinica Gut. Uschia na saja la situaziun betg sa midada da tala moda che giustifitgassia da midar la planisaziun.
Iniziants na tiran betg vinavant il cas
E tenor la Posta Ladina na tiran ils iniziants betg vinavant il cas avant Tribunal federal, uschia che la decisiun po ir en vigur, e la planisaziun locala «Serletta Sid» va en vigur sco decidì dal pievel ils 2015, e confermà dal Tribunal federal il 2021.