Il cussegl da scola da Scuol ha appellà als geniturs da betg parcar davant porta. Ils uffants duessan, sche pussaivel, chaminar a chasa. Quai tutga tar l’educaziun, uschè lur opiniun.
Divers geniturs vesan quai auter
Ina famiglia abita a l'ur dal vitg, il viadi da lur uffant e memia lung per ir a chasa. In auter genitur fa quai per far in plaschair a l'uffant ed anc in auter di cleramain che la via vers chasa saja memia privlusa. E per finir di in bab che ses uffant na saja betg uschè enavant per laschar ir sulet sin via.
Co schliar la situaziun
La polizia chantunala sco era il cussegl da scola appelleschan als geniturs da betg parcar gist davant la chasa da scolina. Ina varianta fiss da parcar en vischinanza sin in parcadi segir e lura chaminar ils ultims tschient meters, uschia fiss la situaziun bainquant pli segira.
Per il cussegl da scola n'è la situaziun actuala betg acceptabla. Els prevesan perquai perfin da laschar scumandar da pudair parcar tranter las 11:00 e las 12:00 en quella zona. Ma betg mo a Scuol ston ins preveder mesiras, era en autras fracziuns datti anc problems ch'il cussegl da scola vul en avegnir schliar.
RR actualitad 17:00 / TSG 17:40