La fin favrer da quest onn ha ina gruppa da privats fundà a Segl la societad «Plattafuorma democratica Segl». Quella societad vul avair pli ferm pled en chapitel en la politica communala da Segl e pretenda da la suprastanza communala dapli transparenza en temas e decisiuns politicas. En il fratemp ha la societad privata circa 30 commembras e commembers.
Nus ans chattain mintgamai avant las radunanzas communalas per discutar temas impurtants e manain quella opiniun lura davant il pievel.
Inscuntrà cun la suprastanza
La suprastanza communala s’ha inscuntrada cun ils responsabels da la societad. Durant 20 minutas han quels survegnì l’occasiun da preschentar lur idea.
Da principi è la suprastanza communala averta per discurs, che portan enavant l’entira populaziun. Pli difficil vesa la presidenta communala quai, sche la societad vul survegliar, ni controllar l’executiva e l’administraziun communala.
Sco vischnanca essan nus obligads d’infurmar l’entira populaziun, e betg mo singulas gruppaziuns.
Chattar il dialog, quai è la finamira da la plattafurma co era da la vischnanca da Segl. Decisiv saja l’encletga vicendaivla en ina vischnanca democratica.