La firma novfundada Kulm Engadin Immobilien SA ha cumprà las parcellas che furman l'areal «Serletta Sid» a San Murezzan. Quai è da leger en ina communicaziun communabla da las partidas involvidas. Cun la vendita na vegn il project da fin ussa per in hotel da sanadad inclusiv l'instituziun medicinala betg persequità vinavant e terminà uffizialmain.
La vendidra di ch'ella haja decidì quai per motivs da fatschenta. Cun sia firma veglia ella sa concentrar sin auters secturs, nua ch'ella vesa novas schanzas.
Nus n'avain gì nagina dispita. Igl è cler per tuts ch'i dat recurs sch'insatgi vul bajegiar. Ussa avain nus chattà ina soluziun e tuts èn cuntents.
Il medem mument accentuescha ella che la nova proprietaria sviluppeschia vinavant l'areal cun responsabladad.
Dus areals, ina strategia
La Kulm Engadin Immobilien SA è vegnida fundada dals medems acziunaris principals davos la Grand Hotels Engadinerkulm Holding. Per la nova possessura da las parcellas «Serletta Sid» datti uschia ina nova situaziun da partenza: Ils dus territoris «Serletta Nord» (gia en possess da la Grand Hotels Engadinerkulm Holding) e «Serletta Sid» pon uss vegnir planisads cuminaivlamain.
Da nossa vart na datti anc naginas ideas per questa parcella, nus avain ussa dentant temp da chattar ina soluziun per quella.
La finamira è in svilup communabel dals dus bains immobigliars impurtants da San Murezzan. Plans d'utilisaziun concrets n'existan anc betg, la midada da possessura dat dentant temp per examinar e sviluppar in concept general. Davart detagls finanzials èn ins sa cunvegnì da taschair.