A Silvaplauna datti plirs recurs cunter la revisiun parziala da la planisaziun locala Foppas Ost a Surlej. Quai ha communitgà la vischnanca da Silvaplauna. Il suveran da Silvaplauna aveva approvà la revisiun parziala da la planisaziun locala correspundenta il november passà.
A Surlej è tranter auter previs da bajegiar in hotel da «bed and breakfast» cun 200 letgs, sco era tschintg chasas da pliras famiglias cun radund 50 abitaziuns primaras. Sco proxim sto la regenza grischuna decider davart ils recurs. Il project sa retardescha uschia.
Cun il project Foppas Ost vul la vischnanca da Silvaplauna generar spazi d'abitar per indigens.
