Las cursas da chaval – White Turf – a San Murezzan han ina lunga tradiziun. Durant trais dumengias dal mais favrer cumbattan «Jockeys» da tut il mund per la victoria cun lur chavals. Sin il program stat mintgamai er ina cursa da Skijöring. Ina disciplina nua che betg in chavalier sesa sin il chaval – mabain nua ch’in skiunz sa lascha trair dal chaval. En quest gener datti il Skijöring be al White Turf a San Murezzan. Ina legenda dal Skijöring è l’indigen Lupo Wolf. Durant 37 onns ha el cumbattì per victorias. Uss ha el finalmain pudì dar sia cursa da cumià.
Nus avain spetgà divers onns enfin che nus avain chattà giuvens indigens che surpiglian nossa rolla. Uss sun jau cuntent da surdar mes chaval.
Cursa da cumià betg sco giavischà
Ch’il sport porta cun sai in grond ristg, ha demussà la cursa da cumià da Lupo. Causa ina carambolascha a la partenza è in chaval currì senza skiunza e collidà cun Lupo. L’um da 68 onns n’è uschia pia betg arrivà en l'arrivada. La dischillusiun suenter la cursa caotica è gronda tar tut las 10 atletas ed atlets.
I po adina capitar insatge. Quai ston ins simplamain savair.
Tuttina resta la decisiun – Lupo ha dà sia derniera, surdà ses chaval a ses successur ed uschia er surdà las mastrinas a la generaziun giuvna dal Skijöring.
