La planta è bella da guardar, ma ella fa problems. La lupina, che crescha gugent e bain en la cuntrada autalpina appartegna a las neofitas e sa derasa sin donn e cust dad autras plantas indigenas. Vitiers vegn ch’ella stgatscha ils cuaders da terren.
Il rivarel ed il gravarel da flum cuan tuts dus per terra e dovran glera e bancs da sablun a las rivas dal flum.
Circa 20% da tut las cuadas da quests cuaditschs han lieu en Engiadina. Quai vul dir che nus avain ina gronda responsabladad per quests utschels.
Quest onn datti in project spezial. Passa trais emnas cumbattan vischnancas, chatschadras e chatschaders, il servetsch civil e scolaras e scolars cunter la lupina en l’Engiadin’Ota tranter Samedan e Bever.
La lupina è ina planta invasiva e resistenta ed i n’è betg uschè simpel da cumbatter ella. Impurtant tar quest cumbat è ch’ins stgarpa ora la lupina cun ragisch. Sch’ins na lavura betg schuber, sa derasa la planta invasiva adina dapli.
La planta vegn cumbattida en cuntradas umidas renaturadas dapi circa 10 onns en il chantun Grischun. Dapi l’onn 2024 datti in scumond da vendita e la derasaziun vegn controllada.
Per il project actual vegnan investids circa 300 dis da lavur e quai cun la speranza che la populaziun dals cuaders da terren sa laschia mantegnair en Engiadina.