Tar la varianta da sviar il vitg da Susch cun in tunnel pli curt, maness ina via tras il terren da la giardinaria da Susch. Sco quai che la l'ortulana Elisa Bonorand-Müller di, fiss questa varianta il culp mortal per la giardinaria.
Cun questa varianta perdessan nus in grond toc dal terren e la giardinaria fiss trapartida. Sche quella vegn, pudain nus serrar las portas.
La famiglia sa dosta perquai cunter questa varianta. Sco ch'il chantun di, veglian ins uss evaluar pli precis las duas variantas, adattaziuns sajan anc pussaivlas.
In sviament a Susch è finalmain en planisaziun
I duai finalmain – suenter var 50 onns e plirs retards – dar in sviament a Susch. Quai è in da trais projects che la regenza ha instradà en ses plan directiv.
Il plan directiv stoppia dentant anc vegnir approvà tras la Confederaziun – la procedura duria circa in onn e mez fin dus onns.
Ils abitants da Susch spetgan gia vess sin in sviament
La via d'Engiadina passa oz amez tras il center istoric dal vitg da Susch. Cunzunt durant ils dis extrems da l'enviern e da la stad è la fracziun da Susch da la vischnanca da Zernez pia exposta ad ina chargia da traffic relativamain gronda. Quai ha gia dapi onns adina puspè caschunà gronds caos da traffic en la vischnanca. L'onn 2020 ha Hermann Arquint lantschà in'iniziativa per in sviament a Susch per far squitsch a la regenza.
Lunghezza dal tunnel sto anc vegnir eruida
In sviament duai reducir il grond volumen da traffic a Susch. Gia ils onns 1990 eran pliras variantas per in sviament vegnidas discutadas. L'anteriura vischnanca da Susch ed il chantun n'eran dentant betg vegnids a sa cunvegnir lezza giada ad ina varianta. Dapi lura ha l'Uffizi da construcziun bassa dal Grischun fatg avanzar fermamain il studi da variantas. Sis da 19 variantas èn vegnidas examinadas pli detagliadamain.
Per l'inscripziun en il plan directiv vegnan la finala duas variantas persequitadas vinavant. Quellas sa differenzieschan mo areguard la lunghezza dal tunnel. La lunghezza definitiva dal tunnel vegn eruida en connex cun il project d'exposiziun che vegn fatg suenter la procedura dal plan directiv.
Entant ha la regiun Engiadina Bassa / Val Müstair decis d'integrar il concept per distgargiar il traffic a Susch el plan directiv chantunal e regiunal. La proposta è uss deliberada per mauns da l’exposiziun da cooperaziun, uschia che propostas e criticas pudessan anc vegnir resguardadas. Il project vegn calculà cun custs da radund 80 milliuns francs.