Suenter il WEF sto Tavau uschè svelt sco pussaivel puspè guardar or sco avant il WEF. Tenor la vischnanca, genereschan ils hotels durant l’emna dal WEF diesch giadas dapli rument sco normal. Er rument da construcziun datti ina massa. Er sche bleras construcziuns e mobiglia vegnan conservadas ed utilisadas pliras giadas, riva bler material sin il rument.
Lavur dal WEF è essenziala
Las firmas Frei e Stiffler da Tavau portan davent fin 100 tramosas da tut las grondezzas. Quantas tonnas rument che vegn ensemen, na vul il directur, Dominik Frey, betg tradir. Per ses affars saja la lavur dal WEF però essenziala ed ina buna basa. Numnadamain hajan els sper il WEF en emprima lingia lavurs da rumir naiv. Là na sappian ins mai quanta lavur ch'i dat.
Ch’i dat bler rument al WEF, per quai ha Dominik Frey ina tscherta chapientscha. Tenor el saja saja quai adina ina dumonda da paisa: ins po far viadis lungs per depositar il material ubain ch'ins sa decida per curts viadis, ma il rument vegn ars. Da quella decisiun hajan ils collavuraturs da la plazza da zavrar plaschair. Adina puspè dettia chaussas ch'èn novas. Uschia ch’els possian prender a chasa per duvrar.
