In da quels «hotels» sa chatta en l'Engiadina Bassa a Ramosch. Il «Tierferienheim», sco la pensiun vegn era numnada, na porscha betg mo albiert ad animals che n'han nagin da chasa. Qua pon er ils animals passentar lur temp, u meglier ditg lur «vacanzas», cura che lur possessurs e possessuras èn davent. E quai tut all-inclusive, perfin cun ina visita tar il coiffeur.
Tgi ha la responsabladad?
Per ch'ils chauns e giats pon far il «check-in» ston els avair lur attest da vaccinaziun à jour. Jenni Filli, che maina la pensiun gia dapi trais onns, declera che la cumpatibilitad dals animals è era fitg centrala. Quai vala surtut per ils chauns e fa era senn, sch’ins s’imagina ch’enfin 30 chauns partan in dachasa a Ramosch durant il temp da vacanzas.
...sch’il chaun sa fa mal tar nus u vegn mors dad in'auter, lura è quai nossa responsabladad...
Dal reminent funcziunia tut bain, di Jenni Filli, dentant haja era gia dà in u l’auter incap – cunzunt caschunà dals mastgels che n’èn betg chastrads. Quels hajan lura problems cun auters mastgels. Lura èsi da guardar bain. Perquai che sch’insatge capita en la pensiun da vacanzas, lura èn normalmain era els responsabels.
Laschar encrescher – in sentiment betg mo uman
E tge che po era magari capitar cun ir en l'ester – il laschar encrescher. Saja quai per il dachasa u per la persuna preferida. Er ils animals pateschan inqual giada da quai sentiment. Quai sa mussa lura ch’els èn plitost en in chantun e na pon betg far termagls u magliar. Qua gidia, sco era tar nus carstgauns, buna cumpagnia, occupaziun e la maglia preferida, declera Jenni Filli.
Il chaun da Karin Candrian da Sagogn n’enconuscha betg il sentiment da laschar encrescher. Indra, sco il chaun sa numna, dastga magari passentar sias vacanzas en l’hotel da chauns a Bad Ragaz. Per Karin Candrian era quai l’entschatta bain in zic curius, sco ella tradescha, ma cun il temp è ella s’endisada vidlonder.
...uss lasch jau betg pli encrescher uschè bler, dentant observ jau en vacanzas magari ils chauns d’autra glieud.
Er en vacanzas na po ella betg dal tut emblidar ses chaun. Karin Candrian sa dentant che Indra è en buns mauns. Indra enconuschia gia tut las collavuraturas dal «hotel» e sa legra da vesair ellas. Ma, il pli fitg sa legra Indra lura da vesair Karin e la famiglia suenter quai lung temp dapart.
Malgrà che las vacanzas èn bellas,– il pli bel èsi tuttina da pudair turnar a chasa. Cunzunt sch’ins ha in satgados plain bunas memorias ed ina massa da raquintar.
