Siglir tar il cuntegn

Header

cuntegn

Uffizi federal per energia Laschar dapli aua en l'En

Las Ovras electricas Engiadina duain laschar ir pli blera aua da l’En giu davent da S-chanf. L'Uffizi federal d'energia ha annunzià in'ordinaziun che pretenda quai. I va per la dumonda co cumpensar la quantitad d'aua pli pitschna en il Spöl. Las ovras han reducì l’aua restanta per impedir ch’il PCB vegnia transportà vinavant da la val giu.

I va per derschentar material

Tranter S-chanf e Zernez datti adina puspè problems suenter stemprads. Il biolog da pestga Marcel Michel ha declerà envers SRF, che quai dettia adina puspè la situaziun che material da flums laterals vegnan lavads en l’En. Pervi da la pauca aua resta quest material dentant en l’En e donnegescha il spazi da viver dals peschs. Questa situaziun vul l'uffizi schliar cun laschar punctualmain dapli aua da S-chanf en l'En suenter in stemprà.

Sco emprim in experiment

Uss propona l’Uffizi federal d'energia in experiment. Ins vul eruir sche quella soluziun funcziuna. Per quest intent vulan ins bittar glera colurada en l’En e guardar sche quella po vegnir lavada ora cun laschar ir aua a S-chanf. Sche l’experiment vegn fatg n’è anc betg decidì, fin mez favrer èsi pussibel da far recurs. Tar la OEE hai num, che la chaussa vegnia examinada.

audio
Per tadlar: curt e cumpact
ord RTR Audio dals 20.01.2023.
laschar ir. Durada: 1 minuta 10 Secundas.

RTR novitads 06:00

Artitgels legids il pli savens