L'Uniun dals Grischs saja daventada in zic grischa, dian vuschs criticas, ed haja pers in pau il contact cun ils ladins. Motiv avunda per la societad da sa metter vid ina nova strategia. Suenter in emprim workshop haja la suprastanza dentant constatà ch'i saja massa bler da lavurar ora ina nova strategia ed il medem mument cuntinuar cun tut las lavurs operativas. Perquai ha ella decidì da metter ad ir ina gruppa da lavur che duai lavurar ora la nova strategia. Actualmain sajan ins londervi da tschertgar persunas per questa gruppa da lavur, di Victoria Mosca, la nova presidenta da l'Uniun dals Grischs.
Igl è da far in purtret pli grond per lura pudair decider: tge vulain nus insumma e nua dovra quai adattaziuns en l'uniun.
La gruppa da lavur duai prender si lur lavur quest atun e preschentar il meglier cas la nova strategia a la proxima radunanza generala la primavaira che vegn. Actualmain saja la suprastanza londervi da definir las finamiras per quella.
In grond tema è il mund digital. Co vulain nus ans purtar en, tge opziuns avain nus e tge resursas pudain nus duvrar. La dumonda è: nua duai il ladin esser situà en avegnir en il mund digital?
Dasper quai sajan però era dumondas en connex cun la promoziun da la lingua e cultura ladina da respunder, dumondas en connex cun las ediziuns e la vendita da quellas. In emprim pass là saja fatg cun crear in shop online dal Chesin Manella, la libraria ladina a Schlarigna.
Anc avert saja entant la decisiun areguard il num da l'uniun. Per ils proxims in dus onns vegnia quel a restar, surtut pertge che la radunanza generala aveva decidì da betg midar el dal 2021. Tenor Victoria Mosca pudess il process per ina nova strategia dentant era manar ad in nov num per l'UdG. Questa dumonda saja dentant anc cumplettamain averta.
