Dapi la bova dal piz Cengalo l’avust 2017 è la chamona Sciora serrada. La bova aveva numnadamain destruì la via d’access sin la chamona. Ussa datti ina nova senda.
Uschia è la via vers la chamona puspè libra e la chamona po puspè avrir sias portas.
1 milliun francs, 4 punts pendentas
La nova senda che maina sin la chamona Sciora sa chatta ordaifer da la zona da privel, da l’autra vart da la Val Bondasca. Ella è var 5 kilometers lunga.
La vischnanca ha realisà ina senda cun 4 punts pendentas e custs da passa 1 milliun francs.
La chamona Sciora era adina bain frequentada. Igl è impurtant ch’ella è puspè accessibla.
Che la chamona Sciora è puspè accessibla saja in pass impurtant, manegia Marcello Crüzer da l'uffizi tecnic da la vischnanca da Bregaglia.
Novas guardiachamona
En la chamona Sciora beneventan novas guardiachamona ils giasts. Cinzia Fanconi e Mauro Cortesi han surpiglià la chamona e pon festivar la reavertura – quai suenter ina pausa sfurzada dad otg onns.
Els sa legrian ch’i dat puspè vita en la val e spetgan plain motivaziun lur emprims giasts.