Mo als indigens è quest tunnel bain zuppà a l'ur dal lai da Segl enconuschent. In fabricat da 500 meters che sviescha tar auas grondas ina part dal flum Fedacla tras la muntogna e direct en il lai, enstagl ch’el passas tras ina chavorgia e lura atras l’entir vitg.
-
Bild 1 von 5. L'entrada è nunspectaculara – e grev da vesair... Bildquelle: RTR.
-
Bild 2 von 5. ...enviern vegn sanà, perquai ch'il privel d'auas grondas è il pli pitschen durant quest temp. Bildquelle: RTR.
-
Bild 3 von 5. Bildquelle: RTR.
-
Bild 4 von 5. Bildquelle: RTR.
-
Bild 5 von 5. Sch'i dat in alarm d'aua han il lavurers be duas minutas temp da bandunar il tunnel. Bildquelle: RTR.
In idea simpla e geniala
Ditg ha la vischnanca da Segl giu in problem cun auazuns. Tut l’aua da la Val Fex, sin in intschess da stgars 34 km² passa tras ina chavorgia e lura tras l’entir vitg da Segl Maria.
Suenter urizis u uradis eran las vias savens inundadas. Diversas mesiras da correcziun dal flum n'avevan betg purtà l’effect giavischà. Dal 1969 han ins lura giu l’idea da la galaria. E quella ha fatg ses duair fin al di dad oz.
Sche jau pens mo ils davos onns quantas giadas che la galaria era en funcziun. Quella è fitg impurtanta per il vitg da Segl.
Malgrà ch’ina gronda part da la galaria è anc en in bun stadi, sto ella tuttina vegnir sanada per ch’ella possa cuntinuar sia funcziun era ils proxims 50-80 onns. Lavurà vegn mo d’enviern, perquai ch'il privel per auas grondas è lura il pli pitschen. Logisticamain èsi ina fida, perquai che mo paucas persunas dastgan lavurar en il tunnel pervi da la segirezza. Different sensurs en la Val Fex alarmeschan subit cura ch'i dat midadas dal spievel da l’aua. Lura han els mo duas minutas per bandunar il tunnel.
L’entira sanaziun da la galaria custa enturn 2,5 milliuns francs e vegn finanziada da la vischnanca ed era dal chantun e da la confederaziun.