11 variantas èn vegnidas preschentadas en il decurs dals davos 40 onns – da glischs che reglan il traffic tras la fracziun da Santa Maria fin in tunnel sut l'entira fracziun ora. Cun la decisiun da la Confederaziun e dal chantun dastgan ins finalmain cumenzar a projectar.
Sche tut funcziuna senza incaps e recurs, lura fissi uschia pussaivel da cumenzar a bajegiar il sviament en trais fin quatter onns.
La populaziun è però anc adina da differenta opiniun, quai che reguarda questa decisiun da la Confederaziun e dal chantun.
Blers avessan giavischà la varianta cun dus tunnels vers il sid da la fracziun – cun era gist integrar la via dal pass da l'Umbrail.
Jau avess giavischà la varianta sid. Ma era questa schlia il traffic per 90% – e quai è bun.
Il project nord prevesa da sviar la fracziun da Sta. Maria senza integrar il pass da l'Umbrail che maina en direcziun Valtellina fin a Bormio (I). Tenor la presidenta communala vegn quest project a custar radund 60 milliuns francs.