La riva dal Lai da San Murezzan è in magnet. Ella è spazi da viver, ma era spazi da recreaziun per indigens e giasts. Dapi l’onn 2018 è la vischnanca londervi a planisar il project «Riva Viva» che vul en otg etappas meglierar la situaziun sin il traject da 4,4 kilometers enturn il lai, embellir e revitalisar la riva.
Decisiun davart l'emprima etappa dal project
L’emprima etappa è quella che chaschuna discussiuns. D'ina vart vegn meglierada la situaziun da velocipedistas e viandants. Planisà èsi da schlargiar la via da viandar tranter las duas rundellas a San Murezzan uschia che la segirezza dal traffic vegn augmentada, da l’autra vart vul ins tar la plazza da golf da la Meierei midar il trassé da via, davent da la riva dal lai.
-
Bild 1 von 3. La via a l'ur dal Lai da San Murezzan duai vegnir schlargiada sin 4,5 meters. Bildquelle: vischnanca San Murezzan.
-
Bild 2 von 3. La riva duai era esser lieu d'inscunter. Bildquelle: vischnanca San Murezzan.
-
Bild 3 von 3. Bildquelle: vischnanca San Murezzan.
Quest midament vegn era fatg per cumpensar las lavurs sin las autras etappas. Cun prender davent la senda da la riva dal lai duess la natira survegnir dapli spazi. Spazi da viver per animals ch'han adina pli grev da chattar in lieu per viver.
L’entir project è planisà en otg etappas cun mintgamai votar davart la fatschenta. Uschia duess la populaziun avair pled en chapitel ed ils patruns da construcziun pon d'etappa ad etappa adattar, meglierar ubain reagir sin inputs. Sche tut las etappas vegnan acceptadas dal suveran, lura duess il project esser terminà fin l’onn 2031 e custar 13 milliuns francs.