Per la quarta giada ha ella gì lieu: l'emna da la furmaziun professiunala. 23 chantuns da tut las regiuns linguisticas èn sa participads e quai cun ina finamira: render visibel la furmaziun professiunala, pia ils emprendissadis. I saja numnadamain impurtant ch'ina gronda part dals giuvenils sa decidia per questa via da scolaziun, di Curdin Tuor. El è il manader da l'Uffizi per la furmaziun professiunala en il chantun Grischun.
Tgi bajegia las chasas en il futur, tgi fa ina construcziun per ina cuschina, tgi fa la reparatura vid l'auto – il davos è noss'economia dependenta da glieud qualifitgada.
Da l'emna speziala han radund 40 staziuns da radio ed era ulteriuras medias rapportà. Els han manà discurs cun emprendistas ed emprendists, campiuns professiunals e discutà cun pliras persunas dal fatg. La collavuraziun cun las medias saja impurtanta per far attent a l'emna da la furmaziun professiunala, ma er la cooperaziun cun auters partenaris saja relevanta. Uschia per exempel cun Swiss Skills, l'organisaziun ch'organisescha campiunadis da professiuns en Svizra.
Betg memia paucs giuvenils che fan in emprendissadi
L'emprendissadi ch'è dapi blers onns il pli popular en il Grischun è quel da la commerzianta e dal commerziant. L'onn passà han 224 giuvenils cumenzà en quest sectur lur emprendissadi. Pli difficil da chattar emprendists èsi per exempel en las professiuns da miraduras, da scrinaris u da spezialistas d'auto. En questas spartas han mintgamai 40 giuvenils cumenzà lur scolaziun.
Jau sun persvadì da quai ch'i resta attractiv en il futur d'emprender in mastergn, da far ina furmaziun professiunala da basa.
En Svizra fetschian dus terzs dals giuvenils in emprendissadi, en il Grischun sajan quai schizunt 80%. Quest dumber na saja er betg sa midà ferm ils davos onns. E che quai stettia uschia, da quai è Curdin Tuor persvadì.