Il 2026 turna la festa federala da tir per la quarta giada en il Grischun. Igl è in dals eveniments ils pli gronds en Svizra, bun 36'000 atletas ed atletas vegnan a prender part. Uss è il comité d'organisaziun dentant confruntà cun in svilup nunspetgà. Dapi quest glindesdi èsi cler: la nova halla da la citad a Cuira sin l'areal Obere au na vegn betg ad esser a fin sco planisà il zercladur 2026 er uschia er betg ad uras per la festa federala da tir.
Avrir la nova halla gia il zercladur muntass in risico betg proporziunà.
Schegea che la construcziun da la nova halla fetschia uschè lunsch bun progress, na saja betg pussaivel d'ademplir las pretensiuns d'infrastructura e segirtad per ina festa d'ina tala dimensiun sin il zercladur da l'auter onn, scriva la Stadthalle Chur AG. L'avertura da la nova halla saja pir pussaivla l'atun 2026. Quai munta pia ch'i dovra alternativas per la festa da tir e ch'il comité d'organisaziun sto reagir a curta vista.
A la tschertga d'in plan B
«Nus essan pir vegnids infurmads avant paucs dis che la nova halla da la citad da Cuira na vegn betg ad esser pronta ad uras per la festa da tir», ha Martin Candinas – il president dal comité d'organisaziun – declarà. Il comité haja dentant gia dapi l'entschatta era tegnì en egl opziuns per in plan B parallel al plan A, cunquai ch'i era intschert quant spert che la nova halla d'event vegnia a far progress.
Co il plan B vesa ora concret, quai vegnan ils responsabels a sclerir fin la fin da las vacanzas da stad.
Actualmain saja il comité vi da sclerir concretamain tuttas alternativas pussaivlas. Peter Bänziger saja dentant da buna speranza ch'ins chattia per tut ina schliaziun adattada e possia porscher ina festa nunemblidaivla. Fin uss è mo cler ch'il stadion Thomas-Domenig vegn ad avair ina funcziun centrala en ina u l'autra furma.
Celebrar «tradiziun e passiun»
La 59avla ediziun da la festa federala da tir 2026 stat sut il motto «tradiziun e passiun». Il comité d'organisaziun veglia pia cumbinar aspects tradiziunals cun adattaziuns innovativas ed era persistentas.
Nus vulain organisar ina festa persistenta e nunemblidaivla.
Per pudair porscher ina festa nunemblidaivla vul il comité d'organisaziun plinavant recrutar radund 5'000 voluntaris e voluntarias che duain gidar a moda flexibla che l'occurrenza vegn in success. Grazia a divers sponsurs e partenaris hajan ins entant cuntanschì il fundament finanzial ch'è necessari per realisar la festa ambiziunada. In punct culminant vegnia segir ad esser il grond til a Cuira, ils 13 da zercladur 2026. I vegn quintà che var 1'000 persunas da l'entira Svizra sa participeschan a quest til.
Or da l'archiv: