En la Foppa hai – en las var 12 uniuns da tir – anc 25 tiraduras e tiraduras giuvens ad onn, di Hermann «Mani» Jemmi ch’è dapi 30 onns manader da curs per tiraduras e tiradurs giuvens. Actualmain cumenza la mesadad d’els il tir, perquai ch’els enconuschan quai or dals gieus da video e da films.
Circa la mesadad vul empruvar ora pervi dals gieus da video e films. Quels ch'han plaschair restan enfin 20 onns.
La segirtad ha la prioritad la pli auta. Els fetschian cler dapi l’entschatta che las tiraduras ed ils tiradurs na dastgian betg laschar la serradira en l’arma e che quai saja ina buis malsegira, declera il manader dals tiradurs giuvens. Ins vesia, co la glieud giuvna giaja enturn cun la buis, e co ch’ella prendia si quai.
Il stadi sustegn ils curs da tir per tiraduras e tiradurs giuvens: Las persunas sur 15 onns survegnan durant il curs ina buis dal stadi per exercitar. Plinavant survegnan els tranter 120 e 150 culps pajads. Uschia possia la glieud giuvna exercitar senza custs supplementars.
Tir da 300 meters ha in grev stan
Il militar s'allontaneschia dal tir da precisiun e mettia dapli paisa sin il tir tactic. Cura ch’i giaja per insumma far il servetsch militar, observa Mani Jemmi ch’ils giuvens èn puspè inclinads da far quest servetsch. Il tir da 300 meters haja era ord vista finanziala, in grev stan.
Ils stans da tir sajan per gronda part pajads giu e vegnian da sa mantegnair ils proxims onns. Ma plaunet na vegnian las vischnancas betg a pajar, sche mo paucs pratitgeschian il sport. L’avegnir saja tar ils calibers pli pitschens. Las tiraduras ed ils tiradurs ambizius da la gruppa fan l’enviern in curs da tir sin 10 meters. La finamira dal sport saja ina distanza pli curta.
Tranter tradiziun e responsabladad
Buis d'assagl dattan schlops, concentraziun cumplaina ed in maun ruassaivel. Sin il stan da sajettar da 300 meters a Duin èn ils tiradurs e tiraduras giuvnas vid emprender da sajettar. La societad da tir da Castrisch organisescha mintg'onn in curs per las ed ils giuvens tiradurs da la Foppa. Il curs da tiradurs giuvens è bain frequentà, var 25 persunas giuvnas sa participeschan quest onn. Il dumber è restà constant ils davos onns.
Las participantas ed ils participants han tranter 12 e 20 onns e vegnan da differentas vischnancas da la regiun. Las tiraduras e tiradurs èn el stan da sajettar, giaschan sin mattas en venter e prendan en mira la schiba cun tutta concentraziun.
Sin il stan da sajettar
-
Bild 1 von 3. A la fin dal tir èsi da prender dapart e schubregiar l’arma. Bildquelle: RTR.
-
Bild 2 von 3. Ils manaders dal curs accumpognan la glieud giuvna mintgamai tar il tir. Bildquelle: RTR.
-
Bild 3 von 3. Tir cun buis d’assagl 90: I va tranter auter per precisiun e l’endretga tecnica da trer flad. Bildquelle: RTR.
Ils manaders dal curs mettan gronda paisa sin la segirezza e la responsabladad. In dals manaders declera: L'emprim èsi da mussar als participants ch'els han qua in’arma enta maun e ch'els pon blessar grev u mazzar in carstgaun cun quai. El accentuescha che quai saja ina cultura svizra ch'ins stoppia mantegnair, ma adina cun resguard sin las leschas e la segirezza.
La responsabladad e fitg gronda. Ins sto dar adatg e mirar da quell’arma.
La responsabladad saja fitg gronda declera in participant, ma els vegnian manads bain tras il process per evitar accidents. Ultra da la tecnica da sajettar emprendan las tiradurs e tiradurs giuvens era la dretga tecnica da respirar. Ina giuvna tiradura declera, coi va: expirar, tegnair il flad, alura sajettar e puspè respirar.
Il curs è era in'occasiun per la glieud giuvna da sa concentrar sin ina chaussa. Sajettar na possian ins betg dapertut, forsa cun excepziun dals Stadis Unids, manegia in dals giuvens tiradurs. In participant di ch’ad el plascha vid il sajettar da pudair sa concentrar bain sin ina chaussa. E tge che plascha era suenter ch’ils e las tiraduras giuvnas han nettegià lur armas: emprender d’enconuscher in l'auter e star da cumpagnia.