Igl è venderdi saira, la segunda saira da la turnea cun il classicher da films mits «Safety Last!». Fertant che il publicum piglia plazza en la sala principala dal center Glüs a Val, tuna anc da quai sturn gist dasperas en la veglia sala da gimnastica ch'è oz la gardaroba d'orchester.
Musicistas e musicists accordan simultanamain lur instruments, intgins midan en il tenue da concert nair, autras basegnan anc in mument da quietezza.
Jau fatsch quai dapi 30 onns. Oz essan nus be en ina rolla passiva.
Gnervusas n'èn las musicistas ed ils musicists betg. Blera experientscha ed era il fatg che la musica è oz «be» accumpagnament prendan davent ina part da l'adrenalin.
Sco in viadi da scola
La gronda part da l'orchester – che cumpiglia per questa turnea radund 30 persunas – è vegnida ensemen cun in car. Il di ha cumenzà las 15:30 tar la staziun da Cuira.
I para sco in viadi da scola, tut tenor nua che ins sesa regna in'autra atmosfera. «I sa dar ch'ils cools sesan davos u che tscherts instruments sesan ensemen», declera il manager da l'orchester Robin Mittner che fascheva pli baud era part da l'orchester, ed agiunscha ch'i saja «in'atmosfera heterogena».
Intgins dorman, autras taidlan musica u èn vi dal tablet u dal telefonin. Gist davos Robin Mittner, en retscha trais, sesa il dirigent Laurent Zufferey ch'interrumpa sin il telefonin ina partida curling per declerar las particularitads d'in concert accumpagnant per in film.
Ins na po betg variar grond cun il tempo. La musica sto esser sincrona cun il purtret.
Responsabel per esser sincron saja il dirigent di la violista Silvia Matile Eggenberger, ch'è fa part dapli 30 onns da la Kammerphilharmonie Grischun. Las musicistas ed ils musicists stoppian dentant esser fitg alerts per pudair metter enturn ad uras las indicaziuns dal dirigent.
Davos las culissas
-
Bild 1 von 3. Il computer che mussa il film è era ina sort metronom. Il rintg alv cumpara e svanescha cun mintga tact, sisum a dretg è il numer dal tact actual. Quai gida al dirigent per esser sincron cun musica e maletg. Bildquelle: RTR.
-
Bild 2 von 3. La sala dal center Glüs a Val durant las emprovas. En mintga sala da la turnea fa l'orchester ina curta emprova per sa disar da l'acustica. Bildquelle: RTR.
-
Bild 3 von 3. L'orchester suna anc intginas passaschas impurtantas. Perquai ch'il film vegn mussà davos l'orchester, suna quel en il stgir. Bildquelle: RTR.
Ina saira intensiva
Suenter viadi, emprovas d'acustica e tschaina vai liber curt suenter las otg. Durant bunamain l'entir film da 73 minutas suna quasi adina l'entir orchester. Ina saira intensiva cun pauc spazi per creativitad, di ina part – precis quai è l'intent, argumentescha tschella vart.
Il concert e film
-
Bild 1 von 3. Avant il concert. Bildquelle: MAD, Beat Sieber.
-
Bild 2 von 3. La scena famusa. Bildquelle: MAD, Beat Sieber.
-
Bild 3 von 3. Ils marus èn sa chattads sin il tetg. Bildquelle: MAD, Beat Sieber.
Sch'il public emblida ch'el è era tar in concert è betg be tar in film è pia la finamira cuntanschida. Ed era sche la sala n'è betg stada plaina, è quella part ch'è stada intgantada:
Igl è tut in'autra experientscha da vesair in film cun orchester. Bler pli viv! E tutta emblid'ins magari che la musica e live.
Sper in film che vala sco classicher da films mits ha la musica live persvadì las visitadras ed ils visitaders.