L’incumbensa dal manader da l’Uffizi da finanzas dal chantun Grischun è da guardar ch’il chantun resta adina liquid, uschia che la gestiun quotidiana po vegnir garantida e ch’ils quints pon vegnir pajads. Ils meds liquids ch’il chantun ha alura che vanzan pon vegnir investids, dentant cun tegnair bass il risico. L’onn passà èn quai stads 1,4 milliardas francs ch’eran disponibels per investir. Ina gronda part da quai, circa 90% ha il chantun dà sco emprests.
Total avain nus meds liquids dad 1,4 milliardas francs. Quai vul dentant betg dir che quels giaschan sin in conto da banca cun 0% fit. Mabain vegnan investids – quai èn circa 1,3 milliardas francs che nus avain dà sco emprests.
Dentant na survegn betg mintgin in credit dal chantun, tenor il manader da l’administraziun da finanzas dal chantun Raphael Pfiffner sajan quai per gronda part vischnancas, auters chantuns u instituziuns dal maun public. Per survegnir quests emprests stoppian ins esser solvent, pia avair ina buna bonitad. Ed ins stoppia prender emprests pli gronds –tut tenor a partir da trais u tschintg milliuns.
Rendita da las investiziuns
Il fit directiv da la Banca naziunala Svizra è actualmain tar 0%. La performance dals emprests dal chantun saja tenor il manader da l’administraziun da finanzas tar circa 1,5%. Pli gronda rendita datti tar las aczias – il chantun ha investì circa 10% dals meds liquids en aczias. Quai èn per gronda part aczias svizras. E tut en tut hai l’onn passà dà ina rendita da 15%. Quai saja dentant in maletg dal mument – quai possa adina sa midar, gist era uss cun la situaziun geopolitica.
Sch’ins quintia ensemen la rendita dals emprests e las aczias alura vegnia il chantun Grischun l’onn 2025 sin in profit da circa 30 milliuns francs. Quai sajan circa 3% e tenor Raphael Pfiffner ina buna prestaziun. Surtut perquai ch’il chantun Grischun haja ina strategia d’investir cun pauc risico.
