Il pretsch d'aur na saja betg in pretsch fair. Quai vul dir, i na dat betg facturs dirs che prescrivan quanta valur che l'aur ha. Tenor l'administratur da facultads Damian Gliott è il pretsch d'aur psicologic. Tut tenor tge che capita sin il mund, sa mida il pretsch d'aur.
La situaziun actuala cun las guerras e las crisas laschan crescher il pretsch. Perquai è ussa segir in bun temp per vender l'aur ch'ins na dovra betg pli. Da l'autra vart pudess ins era investir in aur, tgi che vul far quai duess però savair, che investir in aur è ina investiziun per segirezza e betg per far gudogn. Cura ch'il meglier temp da vender u da cumprar aur è, saja grev da predir.
Predir il pretsch d'aur n'è betg pussibel. Sch'il mund sa mida, sa mida er il pretsch d'aur.
Per vender l'aur datti diversas pussibilitads. Tar martgadants d'aur, tar giuveliers u aurerias che cumpran aur vegl, u tut tenor tge aur era sin banca. Betg mintgin porscha lura il medem pretsch e perquai èsi raschunaivel da laschar far offertas da differents cumpraders per survegnir lura il maximum per ses aur.
L'aureria «Unix» a Cuira è ina da quellas che cumpra aur vegl. Per stimar l'aur han ins sco emprim d'evaluar tge aur ch'igl è. Per il pli vegn cliniez fatg or da aur da 750. Quai vul dir 75% è aur il rest è auter material per midar la colur e la direzza dal material. Era enconuschent è la mesira dals carats, aur 750 è 18 carat, aur pur, 999, correspunda a 24 carat. Per part datti er cliniez da 585 (14 carat) u da 375 (9 carat).
Cugliunaders bullan per part in bul sin cliniez che na constat betg cun la qualitad d'aur effectiva.
Pli bassa che la cifra è, pli pauca valur ha il material. Per esser lura propi segir sch'il bul inditgescha la vaira qualitad d'aur datti anc in test cun acid. Quel test fan ins cun ina platta da schist nua che ins sfruscha in zic da l'aur lasura. Cun differents acids che «maglian» l'aur vesan ins lura sche l'aur e gist u fauss e quants promils che l'aur ha insumma.
Cura che la qualitad d'aur è evaluada dependa il pretsch ussa mo anc dal pais. Las ballantschas da las aurerias èn fitg exactas e sensiblas. Plinavant vegnan quellas era mintga dus onns controlladas dal bullader chantunal. Il pais da l'aur vegn lura multiplitgà cun il curs actual da l'aur e lura vegn anc tratg giu in tschert import. Quai èn ils raps ch'i custa da reciclar l'aur vegl.
A la fin ins survegnan ins ina offerta. Impurtant en il cas d'offerta è che ins na lascha betg metter sut squitsch da vender. Quai è adina in indizi per in cumprader betg serius. Cumpraders serius na sforzan betg ad insatgi da vender ses aur.