Suenter che Flurin Camenisch ha finì ses studi da biologia ha el sco emprim cumenzà da lavurar sco scolast secundar. Cun 30 onns ha el lura surpiglià la plazza sco zoolog e pedagog en il Museum da la natira. Quella plazza è vegnida introducida da nov dal chantun e Flurin Camenisch è damai stà l'emprima persuna ch'ha fatg questa lavur.
Ses temp en il museum
En il Museum da la natira grischun a Cuira ha Flurin Camenisch lavurà surtut en l'intermediaziun. El ha manà classas da scola tras il museum, ha manà guidas per persunas creschidas e famiglias ed ha organisà eveniments. El ha declerà animals, spazis da viver e connex en la natira – e quai adina en moda simpla, visibla e cun grond entusiassem.
Mintga giada datti novas situaziuns, dumondas u era respostas tar las qualas ch'ins pensa – mamma mia quai è uschè bel.
Las ultimas duas exposiziuns spezialas ch'el po anc accumpagnar e ch'el ha preschentà l'entschatta da quest onn han per ina num «countdown da la vita» e «fastizs». Omaduas tematicas sa cunfan gist bain cun Flurin Camenisch. Er el lascha enavos blers fastizs: en il museum, tar collegas e tar tut ils visitaders e las visitadras a quals ch'el ha mussà e declerà la natira.
Ses temp sco zoolog e pedagog en il Museum da la natira a Cuira va pia a fin, ma la fascinaziun per la natira e per ils animals resta probabel per adina. Lungurus na daventa il nov capitel damai segir betg.
Jau poss ir sin in prà e poss star là in mez di, e quai è per mai grond divertiment.
Ed er en il Museum da la natira grischun vai vinavant. La successura per Flurin Camenisch è gia fixada. Quella persuna cumenzà lura il settember 2026.