L'aura na pudess betg esser meglra. I n'è betg memia chaud ed er betg memia fraid. Sonda punct las 11:00 è stà il culp da partenza dal Food Festival sin il campus da la scola d'hotellaria EHL a Passugg. Durant l'entir di èn var 800 visitadras e visitaders vegnids sin il territori. Il festival è stà vendì ora – bler per plaschair dals organisaturs.
«Nus essan fitg loschs da dastgar realisar quest festival e quai er anc da bell'aura. Bain essan nus vendids ora, ma sch'insatgi vuless anc vegnir, chattain nus segir anc ina plazza», di l'organisatur e commember da la direcziun Simon Rindlisbacher cun in surrir.
Il Food Festival è fitg impurtant per la scola. Uschia pudain nus ans preschentar.
Sco ch'i tutga tar ina chasa d'ospitalitad, cumenza la visita cun in sitg da bainvegni. La creaziun senza alcohol procura gist per buna luna – che arriva er tar ils giasts.
Quai fa gist plaschair da survegnir sco emprim in sitg da bainvegni enta maun.
Scola da turissem ed ospitalitad EHL Passugg viva l'internaziunalitad
Spezialmain en il center: ils circa 60 students e las students da l'emprim semester ch'han preschentà lur creaziuns culinaricas. Spezialitads regiunalas, dentant era tratgas internaziunalas – uschè multifaras sco la scola sezza. La EHL Passugg ha passa 400 studentas e students da passa 30 naziunalitads. Uschia èn quest onn 30 stans da la partida – ina giada enturn il mund. Peru, Italia, India, China, Corea dal sid ed anc blers auter. Sa chapescha ch'i dat era in u plirs stans dal Grischun.
E tge èn ils highlights?
Highlights hai dà blers: Capuns grischuns, risotto talian u er in hamburger chinais. Tge ch'ils blers giasts han ditg: «Jau ma legrel da pudair empruvar tut.» E per quai vai er la finala tar in Food Festival.
Impressiuns dal Food festival 2025
-
Bild 1 von 5. In bun bainvegni – quai è ospitalitad. Bildquelle: RTR.
-
Bild 2 von 5. Students da la China preschentan lur creaziun: in burger chinais. Bildquelle: RTR.
-
Bild 3 von 5. Era l'India è represchentada. Cler che Samosas na dastgan betg mancar. Bildquelle: RTR.
-
Bild 4 von 5. Il risotto talian – in dals highlights. Bildquelle: RTR.
-
Bild 5 von 5. Stan Grischun cun ils capuns. Bildquelle: RTR.
Ulrike Kuhnhenn – nova directura da la scola EHL a Passugg
Dapi il matg 2025 ha la scola d'hotellaria EHL a Passugg ina nova directura: Ulrike Kuhnhenn. Per ella èsi stà in cumenzament turbulent. Ella ha cumenzà gest a la fin dal semester da primavaira, amez il temp d'examens.
«Quai è natiralmain stà ina fasa intensiva», di Ulrike Kuhnhenn guardond enavos. Tuttina descriva ella las emprimas emnas sco fitg bellas. Blers inscunters cun students e collavuraturs hajan simplifitgà l'entrada. Dal tut senza sfidas n'è l'entschatta dentant betg gartegiada: adina puspè ha la nova directura stuì siglir en l'aua fraida.
Jau hai in avantag: Jau enconusch gia la scola. E tuttina è bler sa midà – quai ch'è bun uschia.
Experientscha a la scola a Passugg ha ella: Gia dal 2014 fin il 2019 ha ella manà l'Academia a Passugg. La dunna ch'ha oz 56 onns è plinavant stada temporarmain docenta per turissem e marketing a la Scola auta spezialisada dal Grischun. Tuttina saja bler auter ozendi, accentuescha ella – la scola saja sa sviluppada fitg ils ultims onns.
Sfidas ed accents
I dettia intginas sfidas: La mancanza da persunal qualifitgà occupa la branscha tant sco la digitalisaziun. Er la pandemia haja laschà ses fastizs. Tant pli impurtant saja per Ulrike Kuhnhenn da sa retegnair entaifer il concern EHL: Cun las duas ulteriuras scolas da Losanna e Singapur possian ins emprender ina da l'autra e nizzegiar sinergias.
Nua ch'ella vul metter ils accents en il futur na possia ella betg anc dir concret – betg perquai ch'ella saja pir curt en uffizi, mabain perquai ch'il martgà sa midia immens svelt. Ina chaussa è dentant clera per ella. «Igl è impurtant da savair: danunder che nus vegnin, tgi che nus essan e per tgi che nus scolain: e nus furmain per il martgà che dovra la glieud», uschia Ulrike Kuhnhenn.