Savannah Haji Ali
La festa da Nadal, sco quai ch'ils cristians festiveschan, n'exista betg dapertut sin quest mund. Per bleras persunas immigradas è quai tut in pau curius e nov. Quai surtut cura ch'els appartegnan ad in'autra religiun e cultura. Pertutgada da quai è la dunna Savannah Haji Ali che deriva oriundamain da la Somalia.
Jau sun muslima e na festivesch betg Nadal. A mai plascha dentant l’ambient cun las bleras glischs e decoraziuns.
Malgrà che la muslima na festiveschan betg Nadal, giauda ella tuttina il temp d'advent qua en il Grischun. Empè da Nadal festivescha la dunna da 49 onns autras festas sco p.ex. il ramadan. En general senta Savannah Haji Ali sentiments maschadads, sch'ella pensa a quai che curra e passa qua durant il temp da Nadal.
Jau na ma sent betg sco ina part da questa festa. Perquai ma sent jau suletta durant quest temp. Perquai less jau ma scuntrar cun auters durant Nadal.
Bassel Orabi
Era Bassel Orabi giauda il temp da Nadal ed era el n'enconuscheva betg avant la festa. Il pli gugent fa el in bun raclette ensemen cun sia figlia. La sera va l'um da 41 onns gugent a spassegiond tras las vias e giassas illuminadas da Cuira.
Famiglia Suganthan
Tgi che tgira gia dapi onns la tradiziun da Nadal è Komala Suganthan e sia famiglia. Gia dapi 20 onns vegn festivà en la chasa Suganthan ils 24 e 25 da december. L'inspiraziun da la famiglia hinduistica per la festa da Nadal, han las duas figlias purtà or da scola da lez temp. Sco che la mamma declera, han las figlias savens discurrì cun conscolaras e conscolars davart la festa. Ch'igl è ina festa che deriva d'in'autra religiun na disturba betg la hinduista. Per Komala Suganthan èn ils dis da december fitg bels ed ella s'allegra mintg'onn da nov sin quest temp.
Sco quai ch'ins auda, festiveschan las immigrantas ed ils immigrants Nadal tuts sin lur moda e maniera. Tgi dapli, tgi damain ed intgins na festiveschan insumma betg. Igl è avert a mintgin da decider, sche e co che la festa da Nadal vegn festivada.
