Be tar il manaschi da las pendicularas vegn quintà cun in donn da var 30 milliuns pervia da la fin da stagiun anticipada. Tenor il president da l’uniun da pendicularas grischunas, Martin Hug, fissan las pendicularas prontas dad avrir puspè. I manchia simplamain la lubientscha da la Confederaziun.
La sperdita ch’è resultada entras la fin anticipada da la stagiun d’enviern po chaschunar donns pli gronds. Normalmain vegn ina part da la svieuta da l'enviern duvrada per cumpensar la stad, cura ch’i dat pli paucs clients. Quella manca ussa per part.
Plinavant sajan era las venditas dals abunaments per la proxima stagiun d’enviern dadas ensemen, cunquai che la malsegirtad domineschia tar la glieud. Quels abunaments fan ora 30% da la svieuta da l’entir onn e vegnian uss er a mancar, manegia Martin Hug. La malsegirtad dals consuments possia tras la recessiun dentant anc cuntinuar vinavant.
Plan d'exit ed instradar mesiras da protecziun
Tenor Martin Hug duajan las pendicularas pudair lantschar il manaschi parallel tar ils auters meds da traffic public. Els proponan da metter en funcziun las pendicularas il pli tard l’entschatta zercladur.
Las pendicularas veglian era elavurar in concept da protecziun. Quel duaja vesair ora sumegliant sco quel dals meds da traffic public. Martin Hug vesa differentas pussaivladads, co instradar quellas. Per exempel dessi dar vaiders transparents tar las cassas u era dischinfectants tar l’entrada. Era mesiras che pussibiliteschan il «social distancing» possian vegnir implementadas.
