Dapi dus onns datti l’uniun GRdigital ch'examinescha projects da la transfurmaziun digitala. Experts ed expertas valiteschan ils projects e dattan ina recumandaziun a la regenza da sustegnair il project finanzial u betg. En tut han els a disposiziun 40 milliuns francs.
En l’emprim onn ha GRdigital s'organisà e bajegia si las structuras. En il segund onn, pia dapi in onn lavuran els era operativ. En tut èn 13 projects vegnids approvads e var 70 èn vegnids inoltrads. Sper l’administraziun che lavura en in pensum da 180% e sper la suprastanza datti anc in gremi d’experts extern cun var 60 experts ed expertas. Fin ch’i vegn tar la decisiun finala sch’in project vegn sustegnì u betg duess quai durar circa dus enfin trais mais. Il project ed ils documents han dad ir tras divers posts:
- Inoltrar la dumonda da sustegn tar l’administraziun da GRdigital.
- In dumber d’experts ed expertas examinescha l’idea e valitescha il project.
- La suprastanza da GRdigital approva la decisiun dal gremi d’experts.
- GRdigital dat ina cussegliaziun al chantun.
- La regenza examinescha il project e decida sch’il project vegn sustegnì finanzial u betg.
Jon Erni, il president, e Marcel Meyer, il mainafatschenta, èn cuntents cun il svilup da l’uniun en ils ultims dus onns. I dat dentant era chaussas ch’els veglian meglierar, per exempel dad elavurar la decisiun pli spert u da dir pli spert e direct sch’in project n'ha betg schanzas da vegnir sustegnì.
