Il preventiv per 2023 da la vischnanca ha in deficit da radund 761'000 francs. Cumpareglià cun il preventiv da 2022 è quai 220'000 francs dapli, tenor la vischnanca Alvra. Cumpigliadas en las expensas èn amortisaziuns da radund 1,2 milliuns francs.
Vitiers vegnan dentant anc entradas extraordinarias dal nov conferiment da la concessiun per l'ovra electrica Casti. Quellas n'èn betg cumpigliadas en quai preventiv.
Bleras expensas pervia da sbuvada
Il preventiv d'investiziuns ha en il mument in deficit da finanziaziun da radund 2,2 milliuns francs. Bunamain sis milliuns francs èn prevesì per l'onn 2023 en connex cun la sbuvada a Brinzauls.
Ulteriuras decisiuns
Il pe da taglia da la vischnanca resta tar 100% da la taglia chantunala simpla. E la quota d'abitaziuns che dastgan vegnidas vendidas a l'exteriur resta tar 100%. En omadus puncts suonda la radunanza communala a la suprastanza da la vischnanca.
