Siglir tar il cuntegn

Header

cuntegn

Alzheimer In tabu che vegn savens zuppentà

Tgi che survegn la diagnosa Alzheimer, emprova savens da zuppentar la malsogna. Per sensibilisar la glieud e per gidar persunas pertutgadas, sustegna l’organisaziun Alzheimer Grischun persunas che dovran agid u vulan s’infurmar meglier davart la malsogna.

Tgi che ha dumondas en connex cun la malsogna Alzheimer u demenza, po tschertgar agid tar Alzheimer Grischun. Regularmain organisescha l’organisaziun tranter auter il «café Zeitlos». Quests inscunters vegnan organisads en l’entir chantun, normalmain ina giada al mais. Sco quai che Gaby Thomann da Parsonz che fa part a la suprastanza dad Alzheimer Grischun di, saja il café l’entschatta stà visità mo stgars. Adina dapli dettia quai però persunas che vegnian e savens piglian els cun in’autra persuna interessada. L’idea da quests inscunters saja da pussibilitar in barat nuncumplitgà tranter persunas cun Alzheimer, confamigliar ed era auters.

audio
Gaby Thomann s'engascha per la tematica da demenza
03:07 min, Actualitad dals 21.09.2021.
laschar ir. Durada: 03:07 minutas.

Visita en scola è stà in success

Sco quai che Gaby Thomann ch’è era deputada dal Cussegl grond ha ditg vinavant, saja il di dad Alzheimer en la scola superiura da Savognin avant quatter onns stà in grond success. I saja impurtant dad infurmar gia scolaras e scolars davart la malsogna. Questa sensibilisaziun saja impurtanta, e cun gieus da rolla hajan las scolaras ed ils scolars pudì s’avischinar meglier a la tematica. Quai saja impurtant perquai ch’i dettia adina puspè uffants e giuvenils ch’hajan parents ch’èn pertutgads da la malsogna.

Adina daplirs survegnan la diagnosa Alzheimer

Tenor ina stima da l’organisaziun Alzheimer Svizra vivan il mument prest 150'000 persunas en Svizra cun demenza. E tenor ina prognosa pudessan en 30 onns viver en Svizra dubel uschè bleras persuans cun Alzheimer u autras furmas da demenza.

Di mundial dad Alzheimer

Il mais da settember ha Alzheimer Grischun deditgà a la malsogna. Durant l’entir mais datti diversas occurrenzas. Ils 21 da settember è il di mundial dad Alzheimer. A Cuira datti diversas occurrenzas publicas.

Legenda: Gaby Thomann lavura en il Center da Sanadad da Savognin. La deputada dal Cussegl grond s'engascha era sco suprastanta per l'organisaziun Alzheimer Grischun. RTR, Federico Belotti

RTR actualitad 07:00

Artitgels legids il pli savens

Scrollar a sanestra Scrollar a dretga