Il project dals architects da renum Herzog & de Meuron è vegnì preschentà per l’emprima giada avant prest nov onns. La visiun è spectaculara, la realisaziun però cumplitgada. In problem central resta la finanziaziun. Ils iniziants e las iniziantas emprovan dapi onns da rimnar ils radund set milliuns francs per la baselgia e l'access cun parcadi. Fin ussa saja mo la mesadad garantida, di Martin Cantieni, il vicepresident da la Fundaziun Baselgia d’autostrada Andeer sin dumonda.
Progress politic
La radunanza communala d’Andeer ha approvà l’october passà la revisiun da la planisaziun locala. Questa cumpiglia era la midada da la parcella nua che la baselgia duess vegnir construida. Anc adina datti però quatter recurs da planisaziun pendents, ha ditg il president da vischnanca Silvio Kunfermann sin dumonda. Dus da quels sa refereschian betg directamain a la baselgia, mabain a l’access previs.
Planisà è in parcadi tar la sortida da Balamburtg, davent da là duessi dar in trutg fin a la baselgia. Ils possessurs dal terren na vulan betg dar quel. Els crititgeschan che il funs agricul daventia adina pli stgar. La vischnanca d’Andeer ha proponì ina cumpensaziun en in auter lieu. Sch'ina cunvegna gartegia, resta il mument avert.
Sco proxim pass avess la regenza grischuna da decider davart la revisiun da la planisaziun locala d’Andeer. En teoria pudess era vegnir fatga ina expropriaziun dal terren ch’i dovra per il trutg. Quai va però mo en cas d'in interess public. Sche la baselgia è d’interess public resta però dispitaivel.
Radunanza communala dat ses consentiment
Sin il livel da la vischnanca è la baselgia dentant in pass vinavant. La fin d'avrigl ha la radunanza communala decis da vulair vinavant metter a disposiziun il terren necessari per construir la baselgia. La lubientscha da bajegiar è numnadamain scadida ils 31 da december 2025.
Or da l'archiv: