La halla polivalenta ad Andeer è stada emplenida la sonda suentermezdi. Numerusas persunas interessadas han dà suatientscha a l'invit a la sentupada da kickoff per il gieu en il liber. Quel vegn preschentà dals 6 fin ils 23 d'avust 2026 tar la centrala da la KHR a Balamburtg/Bärenburg, ina fracziun da la vischnanca Andeer.
Prest 200 interessadas ed interessads
Sco quai che la Cuminànza Culturala Val Schons ch’organisescha il gieu en il liber di, èn 190 gidantras e gidanters s'annunziads – quai per lavurs da voluntari, per il chor da project u per rollas sin tribuna. Quest grond dumber haja surpassà cleramain tut las aspectativas, ha ditg il president dal comité d'organisaziun Daniel Camenisch.
Ussa vegnian ins a far ina tscherna per occupar optimalmain ils differents posts. Quai che pertutgia las acturas ed ils acturs, dovria quai radund 40 persunas. Tant per il chant sco era per rollas cun text dettia quai dapli interess da dunnas, umens sajan en la minoritad.
Era persunas enconuschentas
Al kickoff èn sa preschentads l'autur e reschissur Felix Benesch – sco er las acturas ed ils acturs da professiun Anita Iselin, Liviana Degen e Peter Hottinger.
Sut la direcziun da Christian Klucker han las participantas ed ils participants plinavant pudì gudagnar emprimas impressiuns dal chor da project, che vegn ad esser ina part impurtanta da la producziun.
Istorgia reala – famiglia fictiva
Il gieu en il liber raquinta l'istorgia da la construcziun da las ovras electricas Valragn/Valle di Lei – in project sco paucs auters che caracterisescha la regiun dapi 70 onns.
-
Bild 1 von 12. Daniel Camenisch è il president dal comité d'organisaziun. Bildquelle: RTR.
-
Bild 2 von 12. Il gieu en il liber ha lieu tar la centrala da la KHR a Balamburtg. Bildquelle: RTR.
-
Bild 3 von 12. Liviana Degen è ina da las acturas principalas, ella è stada da vesair en in video a l'occurrenza da kickoff. Bildquelle: RTR.
-
Bild 4 von 12. L'actura Anita Iselin ch'è oriunda d'Andeer e viva en la Germania, è era stada da vesair en in video a l'occurrenza da kickoff. Bildquelle: RTR.
-
Bild 5 von 12. L'emprima prova cun acturas ed acturs interessads per il gieu en il liber. Bildquelle: RTR.
-
Bild 6 von 12. Qua ha il gieu en il liber lieu la stad che vegn. Bildquelle: RTR.
-
Bild 7 von 12. Il reschissur Felix Benesch ch'è creschì si a San Murezzan, en discurs cun Daniel Camenisch. Bildquelle: RTR.
-
Bild 8 von 12. Daniel Camenisch discurra cun l'actur turitgais Peter Hottinger. Bildquelle: RTR.
-
Bild 9 von 12. Christian Klucker tar l'emprima emprova cun interessadas ed interessads chantadurs e chantaduras. Bildquelle: RTR.
-
Bild 10 von 12. Durant l'emprima emprova. Bildquelle: RTR.
-
Bild 11 von 12. Bleras persunas èn sa radunadas en la sala polivalenta ad Andeer la sonda suentermezdi. Bildquelle: RTR.
-
Bild 12 von 12. A la fin hai anc dà in apéro. Bildquelle: RTR.
En il center da l'istorgia stat: Cora, ina giuvna electrotecnicista cun ina istorgia da famiglia electrisanta. Tenor la Cuminànza Culturala Val Schons dettia scenas plain tensiun, gronds siemis ed in zic drama. Il gieu en il liber è triling: tudestg, rumantsch e talian.