L'Uniun da teater Sagogn po guardar enavos sin ordvart fritgaivels 20 onns dapi sia fundaziun l'onn 2005. Betg main che 14 producziuns ha la squadra da teater da Sagogn preschentà en il decurs da dus decennis. E l'uniun ha era preparà per l'october 2025 ina ulteriura producziun. Ina che vegn dentant preschentada al public pir l'entschatta da la stad 2026 e quai betg en la halla polivalenta, mabain sut tschiel avert.
Tant per il script sco per la reschia dal toc che sa numna «In asen per Tello» è Manfred Veraguth responsabel. El di che l'idea da preschentar il toc sut tschiel avert saja vegnida da las giugadras e dals giugaders. «Durant las provas per la preschentaziun previsa per l'october 2025 è la squadra tuttenina stada da l'avis che il toc fiss adattà per dar el liber.»
Uschia che l'Uniun da teater da Sagogn è sa decidida da spustar la producziun ed il termin da la premiera. «In asen per Tello» vegn giugà en il Curtgin Aspermont a Sagogn l'emprima giada ils trais da zercladur 2026.
Revolta en la Cadi
Preparativas per in gieu en il liber datti dentant er a Mustér. Là è sa constituida l'Uniun Dentervals l'onn 2018 aposta per realisar in teater en il liber. Il 2019 ha l'uniun preschentà «La stria da Dentervals» ed il success da quella preschentaziun ha animà l'uniun da far in'ulteriura preschentaziun sut tschiel avert.
Il toc «1799 – Revolta en la Cadi» vegn preschentà a l'ur da la baselgia claustrala. La culissa per la revolta en la Cadi na pudess chapescha betg esser pli adattada damai che la claustra è stada ina prominenta unfrenda da la revolta d'avant passa 220 onns. Gion Hosang presidiescha l'Uniun Dentervals che funcziuna gist sco comité d'organisaziun dal proxim gieu en il liber a Mustér ch'envida a la premiera ils set d'avust 2026. Gion Hosang di che las preparativas sajan s'avanzadas e las rollas surdadas.
«Il mument essan nus fatschentads cun la finanziaziun da l'entir project.» Tenor las explicaziuns dal president da l'Uniun Dentervals è previs da preschentar la «revolta en la Cadi» da la vart encunter damaun da la claustra. «En quest lieu vulain nus eriger ina tribuna per bain 400 aspectaturs.»
In zic pli modest
A Sagogn percunter vegn lavurà la proxima stad cun dimensiuns pli modestas. Manfred Veraguth manegia che l'Uniun da teater da Sagogn vegnia a savair porscher suttetg a 50 fin 60 aspectaturas ed aspectaturs en il Curtgin Aspermont. «Damai che las provas èn gia s'avanzadas savain nus ans concentrar sin tut tschel ch'i dovra per realisar in toc en il liber.» Il reschissur fa attent che l'Uniun da teater da Sagogn dumbria actualmain 25 commembras e commembers.
«Quai n'è betg bler per realisar in toc en il liber ed i dovra l'engaschi cumplain da mintgina e mintgin.» Il toc che Manfred Veraguth ha scrit sa referescha al uvestg da Cuira Tello. Ina figura istorica enconuschenta en Surselva pervia da ses testament che deriva dal otgavel tschientaner e che menziuna per l'emprima giada blers vitgs sursilvans. Manfred Veraguth è bain istoricher, el dovra dentant la figura istorica per stgaffir ina cumedia fictiva che tracta schabetgs ed usits dal vitg da Sagogn. L'uvestg Tello vul far flucs cun ils usits pajauns dals da Sagogn ed el dovra perquai in asen.
Istorgia preschenta
Ina istorgia fictiva ha era Hubert Giger, l'autur da «1799 – Revolta en la Cadi», scrit. Ina che sa basa sin fatgs istorics che èn anc adina detg presents en Surselva. La revolta cunter l'occupaziun franzosa ha chaschunà bleras unfrendas en la populaziun sursilvana. Il vitg da Mustér inclus la claustra èn stads en tschendra. Blera dramatica per in toc dramatic.
René Schnoz vegn ad inscenar il gieu en il liber a Mustér e ses frar Andi Schnoz è responsabel per la musica. Claudio Simonet ed Armin Caduff cumponan las chanzuns ch'in chor ad hoc preschenta sin la tribuna da Mustér la stad proxima. Tant Manfred Veraguth sco Hubert Giger han experientscha cun scriver tocs da teater. Manfred Veraguth ha scrit ed inscenà ina gronda part dals tocs da l'Uniun da teater Sagogn e Hubert Giger ha gia mess sin palpiri l'istorgia da la «Stria da Dentervals».