Il Juliertrail daventa ina part da la ruta naziunala da Schweizmobil nr. 1 «Alpine Bike». La ruta duai en l'avegnir ir sur il Pass dal Güglia enstagl sur il Pass dal Set. La finamira è ina colliaziun attractiva da bike e da viandar en omaduas direcziuns, che va davent dal traffic motorisà e che collia directamain ina cun l'autra las regiuns turisticas Engiadina e Surses.
Avant il cumenzament da la construcziun è vegnì planisà durant radund set onns. Latiers han tutgà:
- studis da variantas,
- discurs cun proprietaris da terren,
- proceduras da la planisaziun dal territori,
- in'examinaziun preliminara chantunala sco er
- dispitas politicas.
L'entschatta dal 2025 è vegnì prendì il referendum cunter il credit d'impegn. Suenter ina votaziun dal pievel ha il project la finala survegnì glisch verda.
Il matg 2026 ha la regenza grischuna integrà il Juliertrail en la rait chantunala da velos ed ha concedì contribuziuns als custs da construcziun. Il chantun surpiglia 60% dals custs imputabels per la construcziun sco er la mesadad dals custs per la signalisaziun.
Radund 8,7 kilometers trail
Tenor il rapport tecnic cumpiglia il project en tut radund 8,7 kilometers. Da quai vegnan radund 5,4 kilometers construids nov e stgars 2,9 kilometers fan ora sendas da viandar existentas. Il trail maina per gronda part per lung da vias existentas tranter Beiva e Silvaplauna.
-
Bild 1 von 3. Sin il Pass dal Güglia suenter la palada dal Juliertrail. Bildquelle: RTR.
-
Bild 2 von 3. Ina part da la senda è gia construida. Bildquelle: RTR.
-
Bild 3 von 3. da san.: Daniel Bosshard, president communal Silvaplana, Jan Steiner, ceo Turissem Engiadina, Daniel Wasescha, president communal Surses, Albert Krucker, directur Savognin Bivio Turissem, . Bildquelle: RTR.
Il traject vegn ad avair ina ladezza tranter 1 meter ed 1,4 meters e construì uschia ch'el po vegnir duvrà tant da viandants sco er da mountainbikers. Tenor ils responsabels dal project duai il trassé chaschunar uschè pitschens custs da mantegniment sco pussaivel e s'integrar en la cuntrada alpina.
Protecziun da natira e cuntrada
Il trail maina tras differents spazis da viver alpins sco guauds da muntogna, pastgets maghers, chaglias bassas e surfatschas da pastgira. Palids bassas per lung dal traject na vegnan tenor il rapport d'ambient betg periclitads. Avant che cumenzar cun las lavurs da construcziun è il trassé vegnì examinà e cartografà da persunas dal fatg. En quest connex han ins constatà singulas spezias da plantas protegidas, en spezial orchideas. Lur lieus duain vegnir guntgids durant la construcziun.
Malgrà differentas mesiras da protecziun dovra il project spazis da viver prezius. Cun la renatiralisaziun da tschancuns che na vegnan betg pli duvrads duai il deficit ecologic vegnir reducì. Sco mesiras substitutivas vegnan examinadas tranter auter la valurisaziun da cuntradas da palì per lung dal traject sco er l'eventuala revitalisaziun d'in dutg alpin gulivà sin il territori da Surses.